Faustino Zapico

Información

Esti artículu ye del 09 Aug 2012, y ta dientro de la sección Blogue, L'Arcu de Texu.

Etiquetes pa esta entrada

, , , , , , , , ,

Yá vagaba

Por fin, paez que la xente empieza a esconsonar. Cientos de miles de persones na cai oponiéndose a los recortes son un bon aniciu, sobre too si tenemos en cuenta que munches de les persones que se manifiesten son de les que siempre dixeron que movilizase nun valía pa nada. Depués de trenta años creyendo en cuentos infantiles, como’l de la Santa Transición, les bendiciones de la Europa Una, Grande y Llibre o les virtudes del turnismu PSOE-PP, la trampa, a la fin, rescampla.

La crisis garró a la gran mayoría del país, incluyendo opinadores y intelectuales orgánicos, en Babia. Fieles devotos del mitu del progresu constante y indefiníu, nun yeren quien a talantar que too pudiera esbarrumbar de sópitu y ensin que naide pudiera aparalo. ¿Qué pensaben que yera la globalización? ¿Qué creín que yera’l capital financieru? España delantre l’espeyu: nin ye tan moderna, nin tan fuerte, nin tan sólida, sinón lo de siempre, un error históricu, el país de la picaresca, el gallu de Morón. Asturies, como siempre, acumulando crisis: la propia, la española y la mundial, pero eso sí, creyendo nos Reis Magos, llámese Cascos, llámese gobiernu central, llámese UE.

Zapatero quemóse porque la crisis fexo rescamplar lo que yera él y el so partíu, un completu inútil ensin idees-fuercia al que’l cargu-y venía grande incluso con vaques gordes, un “bobu solemne”, n’afortunada espresión de Rajoy (faló de mierda quien tien la boca llena). Con un paru disparáu y un deterioru perrápidu de l’actividá económica, dió-y por aplicar los recortes que-y desixía Bruxelles, pero non toos, yá que sabía que diba perder les elecciones de toles maneres. El PP tuvo tres años na oposición prometiendo imposibles, que cuando llegaren ellos too diba iguase anantes d’un añu, porque yera solo una cuestión de confianza. Un sector de la población entamó a esconsonar, el 15M: la xeneración de los trentañeros descubría la política, fartos d’encadenar contratos-basoria y de ver qu’esi paraísu consumista de modernidá y “progresu” col que suañaben non solo nun s’acercaba, sinón que s’alloñaba más ¿O será que nunca foi rial? Empezaron a denunciar non solo al gobiernu, sinón al propiu réxime, y ca vez más, al propiu sistema. Otros, en cambiu, prefirieron siguir suañando con Papá Noel. La Navidá de 2011 trexo’l cambiu de gobiernu. El problema de los deseos ye que delles veces conviértense en rialidá, deben pensar agora munchos votantes del PP.

Siete meses depués, la famosa confianza qu’inspiraba’l PP vese como lo que siempre foi, un gran engañu, como les promeses de nun tocar salarios, pensiones o impuestos. Y cola prima de riesgu peles nubes, aplicando tolos recortes que desixe Bruxelles, nacionalizando la delda de los bancos na operación más indecente en munches xeneraciones que va dexanos hipotecaos per décades, non solo nun se ve la salida a lo cabero’l tunel, sinón que ta too ca vuelta más prieto.

Hai dos meses los mineros desenterraron l’hachu de guerra. Nun doblen. Con toles crítiques que puean facese, que son cuasi infinites, al papel de los sindicatos mineros n’Asturies de venti años p’acá, amosaron una cosa, y ye que los conflictos nun son cosa d’un día de fuelga y procesión, sinón daqué más serio cuando lo que se xuega ye muncho. Y agora yelo. CC.OO. y UGT entamen a amagar nel restu de los sectores, con mieu de que la fola de roxura popular los desborde. La clave ta na seronda. Si esti españíu d’indignación social se mantién nos meses vinientes, y tien tola traza (1 de setiembre entrada en vigor de la xuba del IVA, xuba del paru de la qu’acaba’l branu, estra de Navidá non cobrada polos funcionarios) podemos tar falando de, por primer vez en trenta años, una impugnación global del réxime salíu de la voladura controlada del franquismu va trenta y cinco años. Y el rei, que ta p’abrir la boca, tovía diz esta selmana qu’otros tarín de baxa, pero él tien que trabayar (tu sigue provocando y verás).

La situación económica nun va meyorar esti añu, nin el siguiente. El desgaste y deslexitimación de los partíos turnistes va acelerase ca vuelta más, pero eso nun implica necesariamente que d’ehí vaiga salir una alternativa más democrática, yá qu’agora vamos empezar a pagar les consecuencies de l’ausencia d’una dirección política y sindical dignes d’esi nome, especialmente n’Asturies. Los errores que cometió -cometimos- la esquierda de venti años p’acá pasen factura. Nun tiempu d’aceleración del procesu históricu, nun ye tarde pa igualos, o pa cometelos tovía más graves. Si somos a ello, y si los pueblos d’Europa entamen cola so propia axenda, podemos entrar a curtiu-mediu plazu n’Asturies nun momentu constituyente, nuna d’eses poques coyuntures históriques onde too ye posible. Yá vagaba.

Contestar

Deberíes tar autentificáu pa poder comentar.

Actualizaciones recientes

Comentarios más recientes