Faustino Zapico

Información

Esti artículu ye del 22 Mar 2012, y ta dientro de la sección Blogue.

Etiquetes pa esta entrada

, , , , , ,

¿Viva La Pepa?

200 años de la Constitución de Cádiz, la primera del Reinu d’España. Celebraciones y discursos, onde toos intenten averar l’espíritu de La Pepa a les sos actuales postures. Rajoy y el PP tenten apropiase del espíritu de 1812, asociando les reformes de los constituyentes de Cádiz a les que ta entamando él. La diferencia ye que les reformes gaditanes yeren p’acabar colos privilexos, y estes sonlo p’afitalos. Comparar l’esaniciu del mayoralgu y de los estamentos con l’abaratamientu del despidu ye, como mínimo, una indecencia.

D’otru llau, ver al Borbón falando de la Constitución de 1812, esa mesma que’l so antepasáu Fernando VII suprimió dos veces, esa mesma de la que la so defensa yera causa de condena a muerte, queda un poco paradóxico. Más tovía si se convierte na sida pa la típica ceremonia de besamanos de les autoridaes cortesanes pa col monarca, queriendo asina facer escaecer la llaceriosa impresión que la Casa Rial ta dando énte la opinión pública gracies a les corrupteles d’Urdangarín y la ocultación de les mesmes pol propiu rei.

La esquierda tampoco anda mui acertada, al reivindicar a lo xo aquella constitución. Bien ye verdá que fo’l resultáu d’un procesu revolucionariu, que les Cortes de Cádiz punxeron les bases pa la fin del Vieyu Réxime, y qu’eso ye emponderable en países tan atrasaos como los que formaben la monarquía hispánica de 1808, que’l propiu Marx catalogaba ente les formes asiátiques de gobiernu, y tovía más si se fai nun contestu de guerra brutal escontra la principal potencia europea nesi momentu, la Francia napoleónica. Pero, en tou casu, dicir como se diz que la Constitución de 1812 afita les bases de la democracia ye un grave error, tanto históricu como políticu.

Porque vamos ver. Una Constitución qu’afita un sistema monárquicu onde’l rei controla’l poder executivu, onde nun hai llibertá de cultos, que ye prohibida espresamente, qu’afita un estáu centralista qu’esanicia instituciones y llendes de los vieyos reinos, que nun permite la llibertá d’asociación precisamente pa qu’obreros y artesanos nun puean organizase, que nun abole la esclavitú, y que namás permite’l sufraxu activu a los probes –esto ye, los probes puen votar, pero solo a los ricos, yá qu’hai un mínimu de renta pa exercer el sufraxu pasivu-, ¿Ye eso una Constitución reivindicable pola esquierda?

Monarquía, centralismu, catolicismu obligatoriu, prohibición de sindicatos, actividá política acutada pa los ricos… ¿Nun ye eso’l paraísu de PP?

Contestar

Deberíes tar autentificáu pa poder comentar.

Actualizaciones recientes

Comentarios más recientes