Faustino Zapico

Información

Esti artículu ye del 03 Jan 2012, y ta dientro de la sección L'Arcu de Texu, Les Noticies.

Etiquetes pa esta entrada

, , , ,

Urdangarín

Usu indebíu de fondos públicos. La pantalla, una ONG. La rialidá, subvenciones millonaries de los gobiernos balear y valencianu por informes de copia y pega sacos de la Rede. Los beneficiarios, los duques de Palma, esto ye, la fía menor y el xenru del monarca. La casa rial entérase, y manda a los duques a los USA. A la fin, la trampa rescampla. Agora, damnatio memoriae, sacando al ciudadanu Urdangarín de los actos públicos y hasta del Muséu de Cera. Como si nun esistiera, como si nun llegara a esistir nunca. Y depués falen de les semeyes trucaes de cuando Stalin.

Si la casa rial yá sabía va años de los negocios illegales de los duques de Palma (de los dos, que pa eso Nóos taba a nome tanto d’él como d’ella) y nun lo denunció… ¿Nun ye encubrimientu de delitu? Si la casa rial pide presunción d’inocencia… ¿Nun tán asumiendo la culpabilidá cola defenestración pública d’Urdangarín, tachándolu de “conducta non ejemplar”? Yá que tamos ¿Cuándo van investigase los negocios del monarca, talantáu pola prensa especializao como l’amu d’una de les mayores fortunes d’Europa? ¿Ye casualidá que los únicos millonarios d’esti país qu’acabaron presos por corrupción, Mario Conde, Javier De la Rosa y Manuel Prado y Colón de Carvajal, yeren toos amigos íntimos y socios del Rei nes sos aventures empresariales?

Perceguera da ver a los cabezaleros del PSOE saliendo en defensa de la casa rial, como bon partíu cortesanu que ye. El PP polo menos mira pa otru llau ¿Será la derecha confesa la qu’acabe trayendo la república? ¿Será la selección natural? ¿Serán los xueces, que tán amosando más valor que los políticos na defensa de la cosa pública? En tiempo de crisis económica ¿Quién aguanta que la casa rial se tea riendo un día sí y otru tamién de 47 millones de súbditos?

Contestar

Deberíes tar autentificáu pa poder comentar.

Actualizaciones recientes

Comentarios más recientes