Faustino Zapico

Información

Esti artículu ye del 06 May 2012, y ta dientro de la sección Blogue, L'Arcu de Texu.

Etiquetes pa esta entrada

, , , , ,

Tócanos a toos

Xueves 26 d’abril. Concentración na Plaza d’España d’Uviéu pa protestar polos retayos n’Educación. Convoquen tolos sindicatos presentes na Xunta de Personal Docente d’Asturies, que son por orde de representación: SUATEA, ANPE, FETE-UGT, CC.OO. y CSIF. Van sobre milenta persones, munches más que nes anteriores convocatories sindicales d’educación, pero munches menos de les necesaries pa xenerar una dinámica de movilización que puea tornar los retayos.

Nun acabamos de ve-y les oreyes al llobu. Nun caemos na cuenta de qu’estos retayos, n’Educación y en tolos demás ámbitos, nun son coyunturales, como diz el ministru Wert, sinón que vinieron pa quedase, porque abren (tovía más) la puerta de la privatización de los servicios públicos y porque suponen l’aniciu de la fin d’un modelu d’estáu capitalista, el Welfare State, que nació de resultes de la crisis de 1929 y, sobre too, del mieu al comunismu na Guerra Fría. Háilos que, creyendo nel calter coyuntural de los retayos, nin siquier son a cayer na cuenta de la so fondura. Si xuben les hores llectives del profesoráu y xuben tamién la cantidá de guah.es por aula nun ye solo que queden na cai la mayoría de los casi 2.000 docentes interinos que tien la rede escolar pública, ye que pa los otros 10.000 la calidá y la cantidá de la xera que-yos queda va ser infinitamente pior. Y nun ye solo eso: el nivel educativu va baxar -tovía más- coles consecuencies a mediu y llargu plazu qu’esto tien pal país. Si Asturies esporta mano d’obra especializao, gracies a la so bona calificación en comparanza con otres comunidaes, nunos años nin siquier va quedar eso pa la mocedá.

La solombra de la resignación y/o la incredulidá espárdese perdayuri. Muncha xente nun acaba de creyer lo que mos bien encima, o nun acaba d’entender la so magnitú. Hai quien diz que coles movilizaciones y les fuelgues nun s’algama un ris -ente ellos ANPE, la segunda fuercia sindical del país nel enseñu públicu per detrás del SUATEA- anque nun acaben de desplicanos cómo pué algamase daqué. ¿Negociando con una conseyera amortizada y interina nel so cargu? ¿Enfotándose nos cinco partíos representaos na Xunta Xeneral mientres escenifiquen el xuegu de los trileros? Esta nun ye una llucha de los docentes interinos namás, nin siquier del conxuntu del profesoráu: yelo de la ciudadanía entera, porque la rebaxa d’un serviciu esencial como la educación yelo tamién del conxuntu de la sociedá. La educación tócanos a toos. Les consecuencies del so esbarrumbe tamién.

Domingu 29 d’abril. Manifestación en Xixón de CC.OO. y UGT pa protestar polos retayos n’educación y sanidá. Avezaos como tán a ser les fuercies mayoritaries, compórtense como si tamién lo fueren nestos dos sectores, cuando nun ye’l casu. Nel enseñu públicu, ente los dos, sacaron el 35% del votu. Sicasí, permítense ignorar a tolos demás sindicatos pa ser los únicos en salir na semeya. Como si yá salieren poco. Como si la que mos xugamos permitiese estes amueses de protagonismu. Repito: nun somos conscientes de lo que mos vien encima. Tócanos a toos.

Contestar

Deberíes tar autentificáu pa poder comentar.

Actualizaciones recientes

Comentarios más recientes