Faustino Zapico

Información

Esti artículu ye del 06 Nov 2011, y ta dientro de la sección L'Arcu de Texu, Les Noticies.

Etiquetes pa esta entrada

, , , , , ,

Tiraniciniu

Quixo la casualidá histórica que’l 20 d’ochobre coincidiera l’anuncia d’ETA de la fin de la so actividá cola muerte de Qadafi pela mano de los sos enemigos. Quien esto escribe nun pudo otro que plasmar sintiendo a los tertulianos de radio y TV celebrar d’un llau la muerte del cabezaleru libiu y del otru facer el so más sentíu homenax a “les 829 víctimes inocentes de la banda terrorista”. Yá se sabe, toles víctimes d’ETA nestos cuarenta años yeren –toos- probes inocentes.

Qadafi, presidente homologáu a nivel internacional y “amigu extravagante” (Aznar dixit) de tolos mandatarios europeos, cayó víctima d’una engatada conxunta de fuercies de la OTAN, que punxeron los aviones, y los rebalbos libios que, en prindándolu, diéron-y una bona tumiza hasta que lu remataron. Qadafi yera un tiranu, nel sentíu más etimolóxicu del términu, y la so muerte ye un auténticu tiranicidiu, eso sí, celebrable poles mentes bienpensantes que dan llecciones de democracia.

Carrero Blanco, xefe de gobiernu del réxime terrorista afitáu n’España en 1936, pero tamién homologáu a nivel internacional, cayó víctima d’una engatada d’ETA en 1974. La so muerte foi otru tiranicidiu, y foi celebrada pola oposición antifranquista, que vía nel almirante un encontu fundamental pa la perpetuación del réxime. ¿Yera Carrero una “víctima inocente”? ¿Yera Melitón Manzanas, xefe de la Brigada Político-Social de Guipúzcoa, “inocente”? Yá valió d’hipocresía: non toles víctimes son iguales, nun pue ser igual nin la valoración ética, nin la política, por muncho que’l dolor que xenere la so muerte ente quien los querín seya, evidentemente, igual d’intensu.

En Libia, esi país que ta acabante de “conquistar la llibertá” (Carme Chacón dixit) el nuevu gobiernu yá anunció que la Xaria va ser la base de la nueva lexislación: acabóse’l divorciu, vuelve la poligamia. Qué guapo, qué democrático. Gracies a la OTAN. Gracies a nós.

Contestar

Deberíes tar autentificáu pa poder comentar.

Actualizaciones recientes

Comentarios más recientes