Faustino Zapico

Información

Esti artículu ye del 06 Feb 2015, y ta dientro de la sección Blogue, L'Arcu de Texu.

Etiquetes pa esta entrada

, , , , ,

Teseo nel llaberintu

Teseo llaberintuSi hai daqué prestoso nel sistema políticu griegu ye la so rapidez. Al otru día de les elecciones del domingu 25 de xineru, nes que la Coalición de la Esquierda Radical (SÝRIZA) ganara col 36’3% de los votos y 149 de los 300 posibles nel Conseyu de los Helenos o parlamentu griegu, Alexis Tsipras yá xuraba’l so cargu como primer ministru y facía pública la composición del gabinete. Mientres n’otros países puen pasar hasta meses ente les elecciones y l’asunción del nuevu gobiernu, abriendo paréntesis d’interinidá mui esmolecedores pero qu’en tiempu de crisis puen ser catastróficos, el fechu de que d’un día pa otru cambie’l gobiernu ye especialmente positivo pa Grecia, necesitada en tou momentu d’una mano nel timón. Eso sí, les trituradores de papel de los ministerios debieron de tar funcionando per tola nueche del domingu, yá que Nueva Democracia (ND) y el Movimientu Socialista Panhelénicu (PASOK) necesitaben borrar toles pruebes posibles de les sos fechoríes. Per primer vez en cuarenta años, Grecia va tar gobernada por una formación que nun ye nin el PP nin el PSOE locales.

Non por anunciada la victoria de SÝRIZA ye menos impactante. Munches son les esperances puestes nesti partíu, vista la rocea que despierta nos poderes económicos que dominen la UE. Sicasí, to que dicir que nun ye’l mio casu. Véolos como unos grandes vendedores de fumu, como yá dixi hai meses (http://faustinozapico.com/blogue/ye-posible-una-anaconda-vexetariana/) anque tengo munches ganes d’equivocame. Creo que nun contestu como’l que tamos viviendo en tola UE, pero particularmente nos estaos interveníos abiertamente o a escondidielles, por nun falar del casu particularmente dramáticu de Grecia, cualisquier discursu que nun fale de rotura abierta cola moneda única y la UE ye vender fumu, ye mantener la esperanza inútil nuna “Europa social” que ye estructuralmente imposible porque la UE nun nació pa eso.

Ye mui ceo pa facer una valoración mínimamente seria de per ónde van dir los tiros. El nuevu gobiernu griegu namás tien diez díis de vida. Sicasí, los datos que van saliendo son contradictorios. La coalición de gobiernu col partíu Griegos Independientes (ANEL), de derecha euroescéptica y con un claru componente relixosu y xovinista, pue entendese na clave de facer frente común énte una Troika énte la qu’esti partíu tien una postura claramente contraria. La otra opción, buscar l’apoyu del Partíu Comunista de Grecia (KKE) quedaba descartada espresamente por esti partíu, que defende la rotura darréu cola UE, polo que pa llevantar una mayoría parlamentaria el pautu yera necesariu. Ta por ver en qué midida ye a condicionar el llabor del nuevu gobiernu. Otres señales, como la de nun meter nenguna muyer nel nuevu gabinete, son rialmente llamatives. Cuesta creer que nun partíu con decenes de miles de militantes nun hebia nenguna muyer capacitada pa ocupar un ministeriu. Como ye evidente que nun ye’l casu, ye más evidente tovía que nun punxeron munchu enfotu en topales. Otros xestos, en cambiu, son más prestosos y rupturistes. El fechu de que’l primer ministru Alexis Tsipras seya’l primer mandatariu que nun fai el so xuramentu delantre’l patriarca ortodoxu supón una amuesa de laicismu inédita na sociedá griega, mui teñida d’un nacionalismu que venceya espresamente la identidá helena cola relixón. De fechu, hasta va pocos años la Constitución griega yera la única de la UE que taba espresamente inspirada… pol Espíritu Santu.

Los movimientos son, como ye normal, contradictorios. D’un llau anúnciase que Grecia nun va apoyar sanciones a Rusia, pero tres díis depués recula. De momentu dizse, y de mantenelo sería un avance pergrande, que Grecia va vetar el Tratáu trasatlánticu UE-USA que consagra’l poder de les multinacionales. De les promeses de quita de la delda yá se pasa a los intentos de malabarismu del ministru de Finances, Yanis Varoufakis, de negociar un pagu aplazáu, pero pagu depués de too, a los acreedores. El fechu de nun reconocer la Troika como interlocutor ye una amuesa de dignidá política, pero la CE, el BM y el FMI van siguir existiendo, obviamente, y van siguir apertando. La miopía alemana, desixendo al nuevu gobiernu griegu aceptar les mesmes condiciones llacerioses qu’aceptaron los sos predecesores, queriendo obligalos a enterrar el so programa neokeynesianu de gastu públicu y nacionalizaciones que podian suponer un mínimu aliendu a un país martirizáu, pue provocar un efectu contrariu que nun depende namás del pueblu griegu, que yá ta saliendo a la cai a defender el programa que votó, sinón tamién del restu de los pueblos d’Europa.

Como tenemos perpoca memoria, la victoria de SÝRIZA anuncióse como’l primer trunfu d’un partíu del PEE (Partíu de la Esquierda Europea) na UE. Asina lo anunció la prensa y la propia esquierda llariega. Pero nun ye verdá. Ente 2008 y 2013 gobernaron en Chipre los comunistes del AKEL (Partíu Progresista del Pueblu Trabayador), que, xuncíos como’l restu de los gobiernos de la Unión a les desixencies de Berlín, acabaron pidiendo en 2012 un rescate financieru pa salir del “corralito” bancariu nel que taba metida la población. Al otru añu, les elecciones dexaben fuera del gobiernu a esa esquierda que, dientro del marcu de la UE, tenía imposible facer una política estremada de la que manden Bruxelles y Berlín. Nun ta de más recordar que la esquierda europea nun movió un deu, nin a nivel institucional nin de movilización popular, en solidariedá con esi Chipre sacrificáu nel altar de la estabilidá financiera. Igual Grecia nun sigue’l mesmu camín, pero nun ta de más recordar que, si el gobiernu helenu enfila pela vía de la confrontación, de pocu-y va valir tener detrás al so pueblu si nun hai movilizaciones masives en tola zona euro en solidariedá.

Y eso llévanos al Reinu d’España. A la posibilidá de que la ND y el PASOK españoles, el PP y el PSOE, queden fuera del gobiernu anantes de qu’acabe esti añu. Y a la posibilidá de qu’esi hipotéticu nuevu gobiernu tea dispuestu a entrar nun camín de confrontación cola UE o si, por contra, acaba siendo igual de submisu y obediente que los anteriores. Evidentemente, too indica que, de dase esi cambiu gubernativu va ser de la mano de Podemos, o alredol del mesmu, que, pesie a les sos eternes ambigüedaes en cuasi too por aquello de “nun restar” ye bien claru cuando quier p’amosar una fe europeísta que nun dexa llugar a duldes sobre’l so amor pola UE, como bien amuesen les entrevistes a los sos cuadros dirixentes. Si realmente se quieren cambiar les coses, ye imprescindible presentase énte’l pueblu (la xente, la bona xente, dicen ellos) diciéndo-y la verdá, y la verdá ye que ye imposible güei una política en beneficiu de la mayoría social ensin francer col xugu de la UE, y eso hai que desplicalo, y desplicar les consecuencies de facelo. Ye mui revesoso pa una fuercia política que namás apurre promeses y soluciones fáciles dar un discursu que se contradiz col llaváu de celebru al que ta sometida la población dende hai trenta años gracies a la collaboración de derecha y esquierda. Si nun lo fexeron otros primero, Podemos nun se ve na obligación de facelo ellos. Pero ye imprescindible si se quier un cambiu real.

Muncho se faló estos díis de les semeyances de Podemos y SÝRIZA. Tanto unos como otros xugaron a reconocese como interlocutores, con evidente y xustificáu resquemor d’IU, que recuerda a quien queria sentilo que SÝRIZA tien muncho más que ver con ellos que col partíu de Pablo Iglesias. Y tienen razón. El partíu matriz de SÝRIZA, Synaspismos, naz nos años 80 como una coalición que yera copia espresa de la IU de 1986, axuntando a comunistes de distintes tendencies y a sectores d’esquierda argayaos del PASOK. La diferencia ta en que, nos primeros 90, el principal partíu comunista, el KKE, salió y los demás acabaron convirtiéndose nun partíu unificáu. Pero en 2004, cuando Synaspismos converxe con otros sectores a esquierda y derecha del KKE pa formar SÝRIZA, fáilo remitiéndose espresamente a IU, de quien copien los estatutos. Xuntos, participen en 2004 na fundación del Partíu de la Esquierda Europea, criatura de Fausto Bertinotti, daquella secretariu xeneral del Partíu de la Refundación Comunista (PRC) d’Italia. La identidá política de SÝRIZA remítese espresamente a la so matriz comunista y antifaxista. Nun nieguen que vienen de la tradición partisana, tanto la de la II Guerra Mundial como la de la Guerra Civil posterior, y nesi contestu hai qu’entender que’l primer actu d’Alexis Tsipras como primer ministru fuera dir a llevar flores a la tumba de 200 partisanos comunistes asesinaos en 1944 poles tropes d’ocupación alemanes. Dada la llercia de Podemos a buscar referentes colectivos anteriores al 78 (anque agora a Pablo Iglesias-y dea por falar del 2 de mayu de 1808), o a los intentos de dulcificar la memoria de la esquierda española convirtiendo a Marcos Ana o a los abogaos d’Atocha en lluchadores “polos d’abaxo”, cuesta imaxinar a un hipotéticu Pablo Iglesias recién investíu presidente visitando una de los cientos de foses comunes de la represión franquista qu’hai per tola xeografía española. D’otru llau, SÝRIZA defínese espresamente anticapitalista. Independientemente de la sinceridá de l’afirmación, el so programa electoral fala espresamente de nacionalizaciones en sectores claves de la economía helena, cosa qu’en Podemos tovía nun vimos. Anque los siguidores de Pablo Iglesias digan qu’eses son semeyances accesories, que lo qu’importa realmente ye lo que simbolicen toes dos fuercies, la voluntá de cambiu, ye esi un argumentu engañosu porque con quien se busca la equivalencia ye col partíu griegu y non con, por poner un casu, el Frente Nacional francés, que tamién simboliza’l cambiu nel so país y amás con un discursu anti-austeridá non menos radical que’l del grupu de la Esquierda Unitaria Europea del que Podemos forma parte. Anque se quiera xugar al adanismu, l’universu simbólicu ye importante nuna organización política. Precisamente por eso Podemos, que quier facer tabula rasa de tolo anterior, ta yá criando la so propia identidá política que, por muncho que digan propios y ayenos, nun ye pa nada asemeyada a la de SÝRIZA.

Volviendo al país helenu, Grecia tien agora dos posibles víes: o encarase cola UE, arreblagando sobre les amenaces indecentes de la Troika, francer y pidir l’ayuda de Rusia y Xina, entrando nun vuelu ensin motor qu’a curtiu plazu va ser de too menos prestosu, o doblar siguiendo la vía chipriota, aceptar les condiciones que-y pongan y con ello matar les esperances que la esquierda europea tien puestes en SÝRIZA. Una tercer vía, como la de facer el xugu un poco menos duru, nun paez tar na axenda alemana, que desixe submisión absoluta.

Si Grecia enfila pel primer camín saliendo del euro, ye l’aniciu del fin de la UE, porque abre perspectives de cambiu pa otros estaos, fai visible que fuera de la xaula europeísta hai vida. Anque la unión monetaria pue sobrevivir a una salida de Grecia, quedaría definitivamente comprometida si lo fexeren más estaos y con una economía más grande, como ye’l casu del Reinu d’España. Si Grecia dobla, y hai munchos meses pa escenificar esi actu de vasallaxe, les perspectives de Podemos puen dir desinflando porque cuayaría la idea de que nun hai otru remediu qu’aceptar les recetes de la Troika, y Podemos llegaría a les elecciones con un programa que sería evidente que ye imposible de cumplir.

Nun ye Alexis Tsipras l’únicu Teseo que ta nel llaberintu. Pablo Iglesias ta n’otru, que ye’l de los sos propies contradicciones. Ta por ver si tanto unu como otru acaben matando al Minotauru o, por contra, ye la Bestia la que los achuquina. Y con ellos, bona parte de la esperanza nuna nueva primavera pa los pueblos.

Contestar

Deberíes tar autentificáu pa poder comentar.

Actualizaciones recientes

Comentarios más recientes