Faustino Zapico

Información

Esti artículu ye del 08 May 2011, y ta dientro de la sección L'Arcu de Texu, Les Noticies.

Etiquetes pa esta entrada

, , ,

Terrorismu

Entrar nuna casa cola orde de nun facer prisioneros y mete-y un tiru na cabeza al oxetivu incluso tando desarmaú… ¿Nun ye terrorismu? Salir públicamente xustificando y aplaudiendo esa acción… ¿Nun ye apoloxía del terrorismu? Apoyar y participar nes acciones béliques escontra un país soberanu, bombardear la casa d’un de los fíos del dictador –internacionalmente reconocíu y afalagáu polos gobiernos mundiales, como l’español-matando tanto al fíu como a cuatro ñetos… ¿Nun ye terrorismu? Negase a condergar los crímenes del franquismu y los de los GAL… ¿Nun ye apoloxía del terrorismu? Sigún los tribunales de la II Restauración, non.

Lo que sí ye terrorismu, o apoloxía del terrorismu, o complicidá col terrorismu, ye qu’Eusko Alkartasuna –argayu del PNV del añu 86-, Alternatiba –argayu d’Esker Batua del añu 2009- y independientes abertzales entamen una coalición electoral, Bildu, con posibilidaes de convertise nuna de les grandes opciones polítiques de Vasconia. La sida pa baltalos ye que un porcentax mui altu de los cabeces de llista son independientes, qu’otru tantu por cientu mui eleváu taba en llistes contaminaes –baltaes- va años por ser de la esquierda abertzale y que les escuches telefóniques a dirixentes d’esa corriente amuesen que quieren votar a Bildu. Si Otegi dixera qu’hai que votar al PP o al PSOE… ¿Sería abondo pa sacalos de les elecciones?

Gustavo d’Arístegui, esi señor que diz que ye diplomáticu y espertu n’integrismu islámicu, que nun-y cayó la cara de vergoña cuando dixo en 2003 pa xustificar la guerra d’Iraq que nesi país había un réxime integrista vinculáu a Al Qaeda y que tenía armes de destrucción masivo, dixo esti día que Bin Laden nun fuera asesináu, sinón “baltáu”. ¿Meteránlu presu? Si dicimos qu’hasta un criminal como Bin Laden tien derechu a un xuiciu xustu –y de pasu a contar tolos negocios que fexo col gobiernu norteamericanu nos años ochenta y noventa- y que los que lu mataron nun son otro que terroristes… ¿Meteránnos presos?

Contestar

Deberíes tar autentificáu pa poder comentar.

Actualizaciones recientes

Comentarios más recientes