Faustino Zapico

Información

Esti artículu ye del 23 May 2004, y ta dientro de la sección Les Noticies.

Etiquetes pa esta entrada

, , , ,

Surrealista

Recicla a PSOE, PP, IU. Asturies agradéztelo. Ye un conseyu d'Izquierda Asturiana (IAS)Ye l’únicu términu posible pa calificar l’actitú del PP asturianu énte’l debate sobre les posibles reformes estatutaries. Ovidio Sánchez diz agora que l’Estatutu asturianu tien de reformase pa llegar al mesmu techu competencial de Cataluña o Vasconia y qu’Asturies ye una nacionalidá histórica. Diz esactamente lo mesmo que lleva diciendo Sergio Marqués dende hai cinco años. Que casualidá que ningún de los dos lo dixera hai seyes, cuando, tando nel gobiernu del Principáu, votaron xuntos la reforma estatutaria que volvía a dexar al nuestru país a la cola del autogobiernu nel Estáu autonómicu, y onde nun s’incluyó la definición d’Asturies como nacionalidá. ¿Por qué esti xiru presuntamente autonomista del PP asturianu? Básicamente, porque hai mui poques posibilidaes de que-yos fagan casu.

El PSOE ta en plenu debate autonómicu, forciáu pola dinámica política del PSC, qu’arrastra al PSOE andaluz a desixir tamién una reforma de másimos. Los sectores más centralistes del partíu de Zapatero tienen agora que combinar con más puxu tovía la esquizofrenia que supón defender un discursu autonomista mecíu con una práctica política sucursalista. Eso vese más claro que nunca n’Asturies. Areces hai un añu definíase como federalista. Güei comparte gobiernu de coalición con una IU-BA que diz defender una reforma estatutaria (hai un añu tovía dicín que de nun dase nun entraben en gobiernu) y niégase a entamar el procesu de reforma, ente otres coses porque sería una amuesa mui clara del fracasu que supunxo la reforma impuesta de 1999. El PP, que comparte la ideoloxía sucursalista del PSOE (por eso votaron xuntos nel 99) diz agora que quier una reforma de másimos, únicamente porque sabe que la FSA nun quier. Asina dexen n’evidencia al gobiernu asturianu, y mui especialmente a IU-BA, que queda nel ridículu de siguir nel gobiernu con un partíu que por activa y por pasiva niégase dafechu a lo qu’IU definía como irrenunciable y qu’agora hasta’l PP diz almitir.

La hipocresía de tou esti debate ye d’escándalu. El PSOE diz que ye federalista pero que nun hai que reformar l’estatutu asturianu. El PP diz que nun hai nada que reformar, pero n’Asturies sí porque tán na oposición y asina ponen n’evidencia al PSOE. IU-BA dicía que la reforma yera irrenunciable pa entrar en gobiernu, pero tán dientro y el PSOE nun-yos fai casu anque tenga permisu de Madrid pa facelo, y nun colen porque’l gobiernu ye un pegamentu mui poderosu. El casu ye que los trés tán faciendo xusto lo contrario de lo que dicen defender, y mentanto, otres comunidaes abren procesos de reforma p’avanzar, dientro de lo curtio del marcu constitucional, nel procesu autonómicu. Asturies, como siempre, ye la risión, tanto polo llacerioso del so mapa políticu como polo patético del nivel de debate y pola escandalosa ausencia d’alternatives efectives a esti procesu, yá que l’asturianismu, por desgracia, nun acaba de presentar una proyectu razonablemente creible. ¿De quién ye la culpa? De toos, de naide, agora ye lo de menos. Hai qu’avanzar.

Contestar

Deberíes tar autentificáu pa poder comentar.

Actualizaciones recientes

Comentarios más recientes