Faustino Zapico

Información

Esti artículu ye del 11 Feb 2011, y ta dientro de la sección L'Arcu de Texu, Les Noticies.

Etiquetes pa esta entrada

, , , , , ,

Sortu

Alfredo Rubalcaba, Ministru d'Interior del Gobiernu del Reinu d'EspañaLa prueba del algodón. La nueva espresión política de la esquierda vasquista, Sortu, tien de pasar la prueba del algodón de los que dan carnets de democracia. Un partíu que naz diciendo espresamente qu’apuesta poles víes esclusivamente polítiques y que diz que s’opondría a la violencia d’ETA d’habela, resulta que nun pue llegalizase porque PSOE y PP dicen que non, que nun val, que tien que condergar non la hipotética violencia futura, sinón la pasada.

Un partíu como’l PP, que tovía nun tuvo’l cuayu de condergar la dictadura franquista, el réxime más criminal de la Historia de la Península, que nun condergó los 250.000 asesinatos de la posguerra, quier que Sortu condergue los 800 d’ETA pa ser llegal. Un partíu qu’apoyó’l güelpe militar en Venezuela y la criminal guerra d’Iraq, que dexó esi país con un millón menos d’habitantes, pretende dar llecciones de como respetar los derechos humanos. Un partíu como’l PSOE, que dende’l gobiernu entamó, dirixó y financió los GAL y que llevó a la so militancia delantre la cárcel de Guadalajara pa sofitar dos terroristes condergaos en firme como Barrionuevo y Vera, y qu’apoya la igualmente criminal guerra d’Afganistán y a un narcogobiernu integrista y corruptu, pretende agora dicir qué ye democrático y qué non.

Falen del cinismu de Batasuna cuando ETA asesinaba, y tienen razón. Pero si falar d’un conceyal asesináu como “un llamentable resultáu del conflictu vascu” ye hipócrita, nun lo ye menos falar de “daños colaterales” cuando n’Afganistán muerren miles de civiles o d’”operación de mantenimientu de la paz” a una guerra abierta colos talibán. ¿O ye que los muertos, cuando son de fuera, son menos muertos? El sufrimientu n’otros países, ¿ye menos sufrimientu?

El gobiernu español nun condergó’l terrorismu d’estáu en Túnez namás que cuando Ben Alí garró la maleta pa escapar ¿Habrá que prohibir al PSOE?

Contestar

Deberíes tar autentificáu pa poder comentar.

Actualizaciones recientes

Comentarios más recientes