Faustino Zapico

Información

Esti artículu ye del 23 Apr 2012, y ta dientro de la sección Blogue, L'Arcu de Texu.

Sobre la xuntura de conceyos

Les condiciones que ta poniendo UPyD al bloque PSOE-IU y al del FAC-PP p’apoyar la investidura de Fernández o Cascos como presidente, figuren de forma irrenunciable trés: el cambiu de la llei electoral, pa xuntar les trés circunscripciones nuna sola, la creación d’una comisión parlamentaria d’investigación del casu Marea y la xuntura de conceyos. Hai que dicir que de les dos primeres, poco pué dicise a la escontra, dao que son de lo más razonable, pero de la tercera, la de la xuntura obligada de conceyos, pué dicise de too, y nada bono.

Hai que dicir de primeres qu’esta propuesta ye la propia d’un partíu nacionalista y ultracentralista como UPyD, que, pol so enfotu homoxeneizador, quier obliganos a toos a encaxar a la fuercia nel so modelu d’España una, grande y llibre como si de la cama de Procusto se tratara. Dao que la xuntura de conceyos ye un debate ensin dulda necesariu en munches comunidaes autónomes, como Castiella y Llión o Aragón, pretende aplicar la plantiya y meter Asturies nesi debate amuesa, como poco, un desconocimientu radical de la propia rialidá asturiana.

De segundes podemos dicir que la propuesta ye demagóxica. UPyD plantega esta propuesta como un slogan populista (recortar gastos presuntamente innecesarios) pa sacar votos nes grandes ciudaes, yá que’l votu urbanu alloñaú dafechu del mundu rural ye la so base electoral, tanto n’Asturies como nel restu del Reinu. UPyD nun tien nenguna base electoral o militante nos conceyos que pretende esaniciar (hai que recordar que, pesie a algamar un escañu nes pasaes elecciones de marzu a la Xunta Xeneral, UPyD nun tien nengún conceyal en toa Asturies) y, visto lo que dicen, ye evidente que tampoco información.

¿Ye verdá qu’hai demasiaos conceyos?

Esa ye, evidentemente, la cuestión clave. Suel dicise, como argumentu d’autoridá, qu’esos que llamen “países de la nuestra redolada” nun tienen tantos conceyos, y, como si eso por sí solo yá fuera un argumentu, equí hai que facer lo mesmo y reducir el númberu d’ellos. En rialidá, ye una afirmación falsa. El Reinu d’España tien 8114 municipios en total, con mediu millón de kilómetros cuadraos y 47 millones d’habitantes. Portugal, ye verdá, con 11’3 millones, tien namás 308 conceyos, pero tien 4259 parroquies (freguesías) con órganos electos y competencies asemeyaes a los conceyos españoles, anque, metíos como tán na fola de recortes, van quitar unes 1.500. Bélxica, con casi 11 millones d’habitantes y 30.000 kilómetros cuadraos (trés veces Asturies) tien 589 namás, lo que vendría a equivalir a unos 2.400 ayuntamientos n’España.

Pero’l casu ye que si miramos pa otros estaos europeos, les proporciones nun tán tan clares. Alemaña, con 82 millones d’habitantes y una superficie inferior a la española, tien 11.493 conceyos. Proporcionalmente a la población, menos qu’España. Pero Austria, con 8’3 millones d’habitantes, tien 2.358, que vien a ser casi’l doble qu’España en rellación a la población. Y Suiza, con 7’7 millones de persones, tien 2.900, qu’equival a qu’España tuviera cásique 18.000 conceyos. Pero’l casu más claru ye’l de Francia, que con un 10% más de superficie qu’España y 62 millones d’habitantes, tien 36.571 conceyos, cuatro veces más qu’España en proporción a la población. Poro, el cuentu de “Ye que n’Europa hai munchos menos conceyos” nun val. Ye, cenciellamente, falsu.

Volviendo pal sur de los Pirineos. 8114 conceyos paecen munchos, o pocos, dependiendo de con quien comparemos. Pal tamañu del país, viendo cómo ye n’otros países “de la redolada”, son pocos. Pero si miramos p’Asturies, el nuestru país, col 2% de la superficie y el 2’2% de la población española, nun llega al 1% de los conceyos. El problema fundamental ta na población d’esos conceyos. Italia, con 8.094 conceyos pa una población de 59 millones d’habitantes y una superficie que ye’l 60% de la española, ta nun procesu de reducción de conceyos, dándose’l branu pasáu un plazu de dos años a tolos conceyos (comuni) de menos de 1.000 habitantes pa qu’escueyan a qué conceyu averáu escueyen xuntase. Lo qu’equí se pretende, esplícitamente por UPyD pero tamién por más sectores, vien a ser lo mesmo: l’esanicie de tolos conceyos de menos de 1.000 habitantes, que n’España son un 40% del total pero que n’Asturies namás son el 20%.

Pero nin siquier ye esa la cuestión. El problema ta en que, a lo xo, tracamúndiase a costafecha conceyu y municipiu. Anque llegalmente seya lo mesmo, tien una configuración estremada. En Castiella o Aragón ye normal que cada pueblu un pocu grande tenga ayuntamientu propiu, siendo montonera los municipios de menos de 100 habitantes, escatafinos d’un tiempu en qu’estes poblaciones tenín cuatro o cinco veces más población. Los pueblos que nun tienen ayuntamientu son les pedaníes, y ye mui normal qu’un municipiu tenga trés o cuatro pedaníes, o como muncho una dolcena. Si comparamos esa rialidá con asturies y Galicia, tamos n’otru mundu.

N’Asturies y Galicia, como en Portugal, los conceyos son sumes de parroquies, que son ca una d’elles un garapiellu de pueblos y llugares. Asturies tien 857 parroquies alministratives, que puen coincidir -o non- coles parroquies históriques relixoses. Ca una d’eses parroquies (el casu más nomáu ye Cangas, con 54) axunta dellos pueblos. El conceyu con más pueblos y llugares ye’l de Mieres, con más de 300, sumando toos ellos menos de 43.000 persones (concretamente’l llugar dende’l qu’escribo esti artículu, Los Nadales, tien 7 habitantes censaos). Asturies y Galicia, col 8% de la superficies estatal y el 8’3% de la población, tienen el 50% de los núcleos de población. El tamañu mediu d’un municipiu español ye de 65 km2, el d’un conceyu asturianu, 136. Cangas tien 864 km2 ¿Con quién quieren que se xunte? Con estos datos, ¿pué dicise seriamente que n’Asturies sobren conceyos? Esa obsesión por esanicialos ¿nun será más bien el resultáu d’aplicar n’Asturies una idea xeneral que pal conxuntu d’España pué valir pero qu’equí ye ridícula? N’Aragón y Castiella hai años que tienen municipios vacios dafechu, esto ye, con 0 habitantes. N’Asturies, los conceyos menos poblaos, Yernes y Tameza y Pezós, anden pelos 180 habitantes, cosa qu’en Teruel, Soria o Zamora ye casi una urbe.

¿Númberu o competencies?

Como resultáu de la propuesta d’UPyD, yá hai quien se dedica a facer mapes d’Asturies faciendo propuestes de xuntura, proponiendo incluso dexar el mapa de conceyos na mitá. Poco pué dicise de lo que nun ye otro qu’ocurrencies. Dende una mesa de despachu ye fácil facer mapes, pero si nun tenemos en cuenta un factor clave, que ye’l tradicional hábitat dispersu de la población asturiana, podemos tar esbabayando. Los que diseñen esos nuevos mapes de conceyos ¿Pararon a pensar nes distancies -les riales, les de la carretera comarcal midida en tiempu de desplazamientu- qu’hai ente la hipotética capital de los nuevos conceyos y los pueblos más alloñaos? ¿Danse cuenta de que, en nome de la simplificación alministrativa, tán achuquinando tovía más el maltratáu mediu rural asturianu? En nome de la simplificación y l’aforru ¿Deberíemos trancar la mitá de los hospitales asturianos, y los que vivan mui lloñe, qu’emigren o muerran? ¿Y si trancamos la mitá de los centros escolares, por exemplu toles escueles públiques con menos de 100 escolinos y tolos institutos con menos de 300? El problema de los conceyos asturianos ¿Yelo de númberu o de competencies?

Otra cosa sería avanzar a un modelu territorial n’Asturies basáu na simplificación del númberu de conceyos pero na potenciación de les parroquies como entes autónomos y con competencies definíes, como fai Portugal, lo que sería muncho más alcorde cola estructura tradicional asturiana y gallega, pero non la española. Si de verdá apostásemos pola democracia participativa, unes xuntes parroquiales con capacidá pa decidir en conceyu abiertu bona parte del presupuestu municipal sí fadrín innecesaria la presencia d’una dolcena de conceyos, que podrín integrase n’otros o xuntase pa facer otros nuevos. Eso sería’l famosu presupuestu participativu, que dende Izquierda Asturiana (IAS) llevamos proponiendo dende 1999 nos programes electorales, siendo los primeros n’Asturies en facelo, qu’amás supondría un aforru de medios y perres mui superior qu’una simple integración forciada d’unos conceyos n’otros perdiendo servicios y población.

Porque la verdá ye que’l mapa de conceyos nun tien por qué ser inamovible o eternu, porque nunca lo foi. En 1808, Asturies tenía 48 conceyos. Había trés, El Valle Altu, el Valle Bah.u (les actuales Peñamelleres) y Ribedeva que nun taben integraes tovía en territoriu asturianu; había conceyos como’l de Castripol qu’axuntaba, grosso modo, toles tierres al occidente del Navia, qu’agora tán repartíes en 14 conceyos; conceyos como’l de Mieres nun esistín y formaben parte del de L.lena, y había otros como Paderni, anguaño n’Uviéu, que yeren más pequeños que l’actual Noreña. Y la dinámica de cambiu sigue: dende los años 90 del sieglu XX esiste en Llugones Conceyu Astur, que quier dixebrar esa parroquia de Siero y que dende 1991 tien conceyales na casa conceyu. Yo mesmu, de la que fui candidatu por IAS a l’alcaldía de Mieres en 2003 y 2007, propunxi públicamente la posibilidá de xuntura ente Mieres y L.lena, volviendo a la situación anterior a 1836. Nun hai llendes sacres, pero tampoco valen esperimentos, ocurrencies o faltosaes. El mediu rural asturianu yá ta mui maltratáu dende va décades como pa qu’una banda de señoritos, aprovechando la situación privilexada que l’aritmética parlamentaria-yos apurrió, decidan dende’l so despachu qué conceyos sobren nel mapa asturianu. Pero lo grave nun ye solo qu’UPyD proponga eso, sinón qu’hebia quien, con tal de llegar a la presidencia asturiana, acabe aceptando una faltosada d’esi tamañu.

Contestar

Deberíes tar autentificáu pa poder comentar.

Actualizaciones recientes

Comentarios más recientes