Faustino Zapico

Información

Esti artículu ye del 27 May 2011, y ta dientro de la sección Blogue.

Etiquetes pa esta entrada

, , , , , ,

Sobre la reforma electoral

Victor d'HondtMuncho se fala estos díis nes asamblees del 15M sobre la reforma de la llei electoral. Siendo esti un tema complexu, que nun pue iguase nun par de tardes inspiraes, l’asamblea de Madrid yá fexo una propuesta de mínimos, que precisamente porque ye tan de mínimos nun concreta cuasi nada, y que diz: “Reforma de la llei electoral. El sistema actual fomenta’l bipartidismu y l’alternancia nel poder mediante un repartu non proporcional d’ésti.  Demandamos una llei electoral que garantice la equidá del votu, independientemente de la opción política y rexón na que se vote”.

Hasta ehí, mui guapo. El problema ta en concretalo, y yá hai quien, siguiendo conseñes partidistes, clamia por una circunscripción única de tol estáu, y con un porcentax mínimu de votos p’algamar representación, colo que’l resultáu final podría ser igual o más de distorsionador de la voluntá popular que’l sistema actual, que yelo, y muncho. Nes pasaes elecciones xenerales de 2008, los resultaos repartiéronse asina:

P.S.O.E. 11.064.524 43,64% 169
P.P. 10.169.973 40,11% 153
CiU 774.317 3,05% 11
EAJ-PNV 303.246 1,20% 6
ESQUERRA 296.473 1,17% 3
I.U. 963.040 3,80% 2
B.N.G. 209.042 0,82% 2
CC-PNC 164.255 0,65% 2
UPyD 303.535 1,20% 1
NA-BAI 62.073 0,24% 1
CA 68.344 0,27%
EA 50.121 0,20%
C’s 45.750 0,18%
PACMA 41.202 0,16%
VERDES 40.438 0,16%
PAR 39.905 0,16%
CHA 37.995 0,15%
NC-CCN 37.968 0,15%
LV-GV 30.111 0,12%
aralar 29.784 0,12%
BLOC-IDPV-EV-EE 29.679 0,12%

Ye evidente que’l sistema presenta resultaos estraños: el PSOE col 43’6% de los votos tien el 48’3% de los escaños, y el PP col 40’1% tien el 43’7%. Mentanto, IU-ICV col 3’8% de los votos tien 0’6% de la representación, y UpyD col 1’2, el 0’3. Partiendo d’esti fecho oxetivu, el problema ta en que, a la de falar del sistema electoral vixente, salen los tópicos y les medies verdaes. Esos tópicos son, básicamente, trés: A) La llei d’Hondt ye mui inxusta y marxina les opciones con menos votos, B) L’actual sistema electoral sobrerrepresenta a los partíos nacionalistes (nacionalistes non españoles, s’entiende), y C) Les llistes abiertes son la solución a tolos males.

El probe D’Hondt cargando culpes

Ye falso que la Llei d’Hondt seya tan inxusta y marxine tanto les opciones con menos votos. El métodu inventáu pol matemáticu belga Victor D’Hondt ye lo que se llama un métodu proporcional correxíu, esto ye, que favorez, anque seya mínimamente, a les opciones más votaes perriba de les minoritaries. Sicasí, lo que fai que’l sistema electoral español seya tan inxustu nun ye que’l sistema de repartu seya la famosa Llei D’Hondt, sinón qu’esta s’aplique en 52 circunscripciones, y que polo tanto los 350 escaños que tien el congresu seyan la suma de los escaños que s’elixen nes 50 provincies y Ceuta y Melilla. El problema ta en que les provincies son unes circunscripciones demasiao pequenes como pa garantizar la proporcionalidá de la representación. Partiendo de que cada provincia tien de tener un mínimu garantizáu de 2 escaños, más l’escañu únicu de Ceuta y el de Melilla, los otros 248 repártense proporcionalmente a la población, y eso lleva a, de mano, a qu’unes provincies tean sobrerrepresentaes a costa d’otres. L’exemplu más evidente ye Soria y Madrid: la primera tien 95.000 habitantes y trés diputaos, y la segunda 6’5 millones y 35 escaños. Soria tien, col 0’20% de la población, el 0’85% de la representación, mientres que Madrid, col 13’74% de la población, tien el 10% de los escaños. Si facemos la comparanza a nivel de comunidaes autónomes, el contraste ye tovía mayor: Castiella y Llión, con 2’5 millones d’habitantes, manda 32 diputaos al congresu, cuasi tantos como Madrid, que tien 3 millones más d’habitantes.

Esa, y non otra, ye la razón de la distorsión del votu. En más de la mitá de les provincies fai falta sacar como mínimo el 12% de los votos pa sacar dalgún escañu, y eso fai que les opciones que nun lleguen a sacalu ven los sos votos “perdíos”, esto ye, ensin representación. De poco val que’l métodu D’Hondt seya proporcional si esa proporcionalidá s’aplica a circunscripciones d’ente 3 y 6 escaños.

Amás, hai otru factor que distorsiona’l votu, y ye la desixencia d’un porcentax mínimu de votos pa sacar escañu, que nes elecciones xenerales españoles ta nel 3% en cada circunscripción. En rialidá, esto namás ye válido nes provincies que manden más de trenta escaños al congresu, como Madrid y Barcelona, porque nes demás fai falta un porcentax rial muncho mayor. En tou casu, ye tremendamente inxusto qu’en Madrid faga falta sacar el 3% de los votos p’algamar representación cuando, gracies a esa llei D’Hondt presuntamente tan mala, y dependiendo de cómo tea’l repartu de votos, con un 2’5 ó 2’6% saldría 1 escañu.

Si la culpa nun ye D’Hondt, será de los nacionalistes

El casu ye poder echa-y la culpa a otru, anque’l sistema electoral que tenemos pautáronlu va trenta años dalguna de les fuercies polítiques qu’agora tanto clamia por quitalu, ente otres casos porque cuando lu pautaron esperaben ser ellos beneficiarios y non damnificaos. Asina, la burra que lleva tolos palos ye’l nacionalismu periféricu. En cuenta d’echar pola sobrerrepresentación del PSOE y PP, los dardos van enfilaos escontra los partíos nacionalistes non españoles. Y si bien ye verdá que’l PNV ta sobrerrepresentáu (1’7% de los escaños col 1’2% del votu), nun ye verdá que seya asina nel casu de CiU (3’14% de los escaños col 3’05% del votu), nin d’Esquerra (0’85% de los escaños col 1’17% del votu), BNG (0’6 col 0’8), Coalición canaria (0’6 y 0’6), o Nafarroa Bai (0’27 y 0’24).

Falar de la sobrerrepresentación del PNV y, de pasu, anque seya mentira, de la de CiU o ERC en cuenta de la del PSOE y PP nun dexa de ser una falcatrúa demagóxica que sirve pa estimular el sentimientu nacionalista -español- escontra los otros nacionalismos. Si el PNV o CiU tienen la representación que tienen ye porque en toles provincies que se presenten saquen representación, y nengún de los sos votos se “pierde”.

…y sinón, de les llistes zarraes

Tamién ye un tópicu falar de cómo l’apertura de llistes aseguraría una mayor llimpieza electoral y una meyor representación ciudadana, yá qu’asina la xente podría votar a los candidatos perriba de la sigla y penalizar aquellos que’l partíu de turnu pon en puestos de salida pesie a tar mui cuestionaos, encausaos pola xusticia o demás controversies. Esi ye’l modelu qu’hai anguaño pal Senáu, onde cada provincia escueye 4 senadores nun sistema de llistes abiertes, pudiendo cada ciudadanu votar hasta un másimu de trés candidatos de cualisquier partíu.

Eso queda mui guapo, pero’l resultáu pue ser tovía más inxustu. De fechu, si el sistema electoral al Congresu presenta distorsiones, el del Senáu ye tovía pior, porque habiendo namás 4 escaños por provincia, y pudiendo amás votase hasta a trés candidatos, na práctica solo dos partíos saquen representación, y cuasi siempre, ye de 3 senadores pa ún, y el restante pal otru, pudiendo dase’l casu de candidatos de terceros partíos que saquen un 20-25% de los votos y nun algamen representación. Que les llistes seyan abiertes, esto ye, que se puea votar a candidatos de más d’un partíu, normalmente sirve pa marxinar tovía más les minoríes. Otra cosa sería que lo que se plantegase fuera que les llistes al Congresu fueren desbloquiaes, esto ye, que votando a un partíu determináu, el votante pudiera escoyer ente dar el votu a la candidatura entera d’esi partíu o bien namás a dellos candidatos de la llista.

Pa eso fai falta amás una muncho meyor información al votante, y una mayor conciencia cívica, porque sinón van siguir saliendo los de siempre pa facer lo de siempre. Por poner un casu: José Manuel Cuervo, alcalde de Cangas pol PSOE de 1983 a 2007, como nun quería volver a ponese a trabayar nel so puestu de profesor d’institutu depués de 24 años d’alcalde, foi puestu a déu como asesor de la Conseyería d’Educación d’Asturies. Él, que llevaba un cuartu de sieglu ensin dar clase y al que-y pasaren perriba trés lleis distintes d’Educación, convertíase n’asesor, y con un sueldu más que curiosu. La prensa féxolo público, y bien que-y sacaron los colores. Pal otru añu, nes elecciones xenerales de 2008, foi candidatu a senador pol so partíu. Como s’apellida Cuervo, diba’l primeru de la llista del PSOE, yá que van pel orde alfabéticu. Siendo’l candidatu más cuestionáu pol so proceder, foi el que más votos sacó con un sistema de llistes abiertes. Pudiendo votase a los otros candidatos del PSOE y a él non, votáronlu igual. Como diba’l primeru…

Posibles alternatives

Hai quien diz que lo más democrático sería una circunscripción única estatal, y qu’eso garantizaría’l principiu d’una persona, un votu. De ser asina, y partiendo de que’l métodu de repartu fuera la Llei D’Hondt (hai otros sistemes más proporcionales, pero les variaciones respecto a esti serín mínimes), el resultáu de les elecciones de 2008 sería esti:

P.S.O.E. 11.064.524 43,64% 160
P.P. 10.169.973 40,11% 147
CiU 774.317 3,05% 11
EAJ-PNV 303.246 1,20% 4
ESQUERRA 296.473 1,17% 4
I.U. 963.040 3,80% 14
B.N.G. 209.042 0,82% 3
CC-PNC 164.255 0,65% 2
UPyD 303.535 1,20% 4
NA-BAI 62.073 0,24% 0
CA 68.344 0,27% 1

Como vemos, PSOE y PP baxarín (el primeru quedaría col 45’7% de los escaños y el segundu col 42’0), IU-ICV y UPyD serín los grandes beneficiaos (los primeros pasarín de 2 a 14 escaños y los segundos de 1 a 4, esto ye, el 4 y el 1’15% de la representacion, respectivamente). CiU quedaría colo que tien, 11 escaños, y el conxuntu de los nacionalistes periféricos quedaría en 25 escaños (perdería el que tien Nafarroa-Bai por un piñu de votos y ganaríalu Coalición Andaluza).

Como vemos, el problema nun son los votos a opciones nacionalistes, anque dellos anecien nello. Les propuestes como la de poner una barrera mínima de votu a nivel de tol Reinu pa poder entrar al repartu, feches col envís de torgar la presencia nel Congresu del nacionalismu vascu, por exemplu, producirín una distorsión del votu tovía mayor. Asina, con una circunscripción única estatal y una barrera del 3% el resultáu sería esti:

P.S.O.E. 11.064.524 43,64% 170
P.P. 10.169.973 40,11% 155
CiU 774.317 3,05% 11
EAJ-PNV 303.246 1,20% 0
ESQUERRA 296.473 1,17% 0
I.U. 963.040 3,80% 14
B.N.G. 209.042 0,82% 0
CC-PNC 164.255 0,65% 0
UPyD 303.535 1,20% 0
NA-BAI 62.073 0,24% 0
CA 68.344 0,27% 0

Como vemos, el resultáu final ye tovía más inxustu que’l que tenemos anguaño. Y tovía sería más si ponemos la barrera nel 5% (anque podíemos ponela nel 10%, como en Turquía, esi gran modelu de democracia). De facelo asina, lo que queda ye esto:

P.S.O.E. 11.064.524 43,64% 181
P.P. 10.169.973 40,11% 169
CiU 774.317 3,05% 0
EAJ-PNV 303.246 1,20% 0
ESQUERRA 296.473 1,17% 0
I.U. 963.040 3,80% 0
B.N.G. 209.042 0,82% 0
CC-PNC 164.255 0,65% 0
UPyD 303.535 1,20% 0
NA-BAI 62.073 0,24% 0
CA 68.344 0,27% 0

¿Qué gracia, verdá? Asina garantizaríemos que 4’2 millones de votos nun tuvieren representación, suponiendo eso más del 40% del votu de los catalanes y más del 45% de los vascos… válidos (de la esclusión del derechu a votu d’un altu porcentax de población vasco falamos otru día). Eso sí que ye democracia y equidá nel votu.

Si partimos de qu’esti ye un estáu unitariu, pero descentralizáu, y que les comunidaes autónomes son los entes intermedios ente l’estáu central y los conceyos, asina como les alministraciones subestatales que más competencies tienen, ensin entrar siquiera nel calter plurinacional del Reinu d’España, o nos territorios históricos que nun procesu centenariu d’agregación acabaron en dar eso que güei ye l’actual Estáu, lo más lóxico ye plantegar que la circunscripción seya l’autonómica, y non la provincia o’l conxuntu del Reinu. Caro que pa eso habría que reformar l’artículu 8 de la Constitución española, y yá puestos a reformar, podría cambiase la propia naturaleza del Estáu, nun procesu constituyente que mos empobinara a una república federal de llibre asociación y milenta coses más. En tou casu, si mos atenemos a una reforma estrictamente pa facer más xustu’l sistema electoral, una propuesta podría ser esa, que les circunscripciones fuesen les comunidaes, garantizando un mínimu de 2 diputaos por comunidá, daes les grandes diferencies de población qu’hai ente unes y otres (esi ye otru matu nel que nun vamos entrar d’esta). Asina, el repartu d’escaños por comunidaes sería esti:

Comunidaes Población Porcentaxe sobre la población total Diputaos
Andalucía 8.415.490 17,80% 2+57= 59
Cataluña 7.512.381 15,98% 2+51= 53
Madrid 6.458.684 13,74% 2+44= 46
Comunidá Valenciana 5.111.706 10,87% 2+34= 36
Galicia 2.797.653 5,95% 2+19= 21
Castiella y Llión 2.559.515 5,44% 2+17= 19
País Vascu 2.178.339 4,63% 2+14= 16
Canaries 2.118.519 4,51% 2+14= 16
Castiella-La Mancha 2.098.373 4,46% 2+14= 16
Murcia 1.461.979 3,11% 2+10= 12
Aragón 1.347.095 2,86% 2+9= 11
Extremadura 1.107.220 2,35% 2+7= 9
Isles Baleares 1.106.049 2,35% 2+7= 9
Asturies 1.084.341 2,31% 2+7= 9
Navarra 636.924 1,35% 2+4= 6
Cantabria 592.250 1,26% 2+4= 6
La Rioja 322.415 0,69% 2+2= 4
Ceuta 80.579 0,17% 1
Melilla 76.034 0,16% 1
47.065.546 100% 350

Con esti repartu, el resultáu electoral de 2008 sería esti:

P.S.O.E. 11.064.524 43,64% 164
P.P. 10.169.973 40,11% 150
CiU 774.317 3,05% 12
EAJ-PNV 303.246 1,20% 5
ESQUERRA 296.473 1,17% 4
I.U. 963.040 3,80% 8
B.N.G. 209.042 0,82% 2
CC-PNC 164.255 0,65% 3
UPyD 303.535 1,20% 1
NA-BAI 62.073 0,24% 1
CA 68.344 0,27% 0

Ye evidente que tampoco sería esactamente esti, porque les opciones minoritaries tendrín seguramente más votos al tener más posibilidaes de sacar representación, lo que fadría menguar el llamáu “votu útil” a los grandes partíos turnistes. Podría dase en tou casu que s’añedieren 50 ó 100 diputaos más al Congresu nuna llista proporcional única pa tol Reinu, al estilu de les elecciones europees, pa “premiar” les opciones más votaes. Nesi casu, ye de suponer que les opciones nacionalistes non españoles formarín coaliciones, como faen nes elecciones europees, col envís d’entrar con más posibilidaes a esi repartu de votos.

Podría añadise tamién que les llistes electorales, siendo zarraes, nun fueren bloquiaes, esto ye, que l’elector pudiera escoyer si votar a tolos miembros de la candidatura d’un partíu (sólo d’ún) o namás a dellos.

¿Y n’Asturies?

No que toca a Asturies, ye evidente que l’actual sistema de trés circunscripciones pa les elecciones autonómiques distorsiona’l votu, yá que sobrerrepresenta les ales. Amás, la barrera llegal del 3% (namás válida pa la circunscripción central, yá que nes ales na práctica hai que metese en porcentaxes del 15% o más pa sacar daqué) tamién introduz una distorsión inaceptable del votu. Asina, los resultaos del otru 22 de mayu fueron estos nel conxuntu d’Asturies:

PARTÍU ESCAÑOS VOTOS
FAC 16 177588 29.75 %
PSOE 15 177714 29.77 %
PP 10 118930 19.92 %
IU-LOS VERDES 4 61513 10.3 %
UPYD 0 14662 2.46 %
IDEAS 0 6337 1.06 %
BLOQUE POR ASTURIES-UNA 0 6160 1.03 %
FDLI 0 4572 0.77 %

De nun haber trés circuncripciones, sinón una sola y ensin porcentax mínimu p’algamar escañu, el repartu sería esti:

PARTÍU ESCAÑOS VOTOS
FAC 14 177588 29.75 %
PSOE 15 177714 29.77 %
PP 10 118930 19.92 %
IU-LOS VERDES 5 61513 10.3 %
UPYD 1 14662 2.46 %
IDEAS 0 6337 1.06 %
BLOQUE POR ASTURIES-UNA 0 6160 1.03 %
FDLI 0 4572 0.77 %

Lo lóxico sería que namás hubiera una sola circunscripción pa toa Asturies, y tamién que, dau’l pesu demográficu que tien la emigración asturiana, al menos ún de los diputaos saliere escoyíu polos asturianos residentes nel esterior.

D’otru llau, Asturies tien una Xunta Xeneral col mesmu númberu de diputaos que va ventiocho años, cuando’l nivel competencial yera muncho menor qu’agora. Amás, los 45 diputaos de la Xunta son bien pocos si los comparamos colos 65 ó 67 d’Estremadura y Aragón, cola mesma población qu’Asturies, los 59 de Baleares, con un cachu menos, o los 50 de Navarra, que tien la mitá. Una propuesta podría ser la d’una Xunta Xeneral de 55 miembros, 54 d’ellos elexíos n’Asturies y otru más polos residentes nel esterior, ensin barrera porcentual mínima o, como muncho, del 2% (que ye la que tienen países como Dinamarca). De ser asina, el resultáu de la elección de 2011 diba ser esti:

PARTÍU ESCAÑOS VOTOS
FAC 17 177588 29.75 %
PSOE 18+1 177714 29.77 %
PP 12 118930 19.92 %
IU-LOS VERDES 6 61513 10.3 %
UPYD 1 14662 2.46 %
IDEAS 0 6337 1.06 %
BLOQUE POR ASTURIES-UNA 0 6160 1.03 %
FDLI 0 4572 0.77 %

De nun haber esi diputáu de la emigración, daríase un empate a escaños (18) ente FAC y PSOE.

Esta ye la propuesta, y la xustificación de la mesma. Son infinites les execiones que puen facése-y, pero nun podrá negase que ye muncho más axustada que l’actual modelu al principiu d’una persona, un votu. ¿Y nun ye esa la base de la democracia?

Actualización 6/06/2011: axunto una presentación de l’Asamblea de DRY Siero sobre l’actual Llei Electoral nel Reinu d’España.

Contestar

Deberíes tar autentificáu pa poder comentar.

Actualizaciones recientes

Comentarios más recientes