Faustino Zapico

Información

Esti artículu ye del 30 May 2005, y ta dientro de la sección Les Noticies.

Etiquetes pa esta entrada

, , , , ,

Síndrome de Fernando VII

Fernando VII

“Vaigamos toos, y yo el primeru, pela caleya constitucional”, dixo Fernando VII depués de que’l golpe d’Estáu dirixíu por Riego en 1820 lu obligara a restituir la Constitución de 1812, qu’él mesmu achuquinara en 1815. Conversu a la fuercia, xuró respetar una Constitución qu’odiaba con tal de siguir nel tronu. Paez qu’esi exemplu entama a cuayar na nuestra clase política, y mui especialmente ente’l PSOE y el PP.
Depués de que Zapatero dixera que tocaba otra vuelta reformar los estatutos, la FSA, incapaz de pensar con cabeza propia, entama agora a almitir esa posibilidá depués de dicir hasta la otra selmana que nun había nada que reformar. El PP asturianu, con tal de dexar n’evidencia a Areces, intenta presentase como’l paladín del autonomismu, cuando xunta’l PSOE fo ún de los verdugos de la reforma estatutaria de 1999. IU, qu’entró nel gobiernu ensin pautar la reforma nin la oficialidá depués de prometer xusto lo contrario, diz agora que toca reformar, pero que como eso nun ta nel pautu de gobiernu nun ye conditio sine qua non pa francer l’alcuerdu si el PSOE diz que nones.

Nerón-Areces, Ovidio Sánchez, Valledor, trés Fernando VII pa esti país, que nun tien un Rafael del Riego pa obligalos a cumplir colo que dicen. La reforma estatutaria paez ser la nueva Constitución de 1812 d’unos políticos que falen ensin tener la menor idega de lo que tán diciendo. ¿Qué normalización llingüística ye posible ensin oficialidá del asturianu? ¿Qué federalismu ye esi nel que ye l’Estáu el que cede les competencies, y amás ensin garantizar l’autonomía financiera? Nos meses vinientes vamos asistir a munches ceremonies de tracamundiu, de regate curtiu, de política del pior nivel, con tal de presentase como los gallos de la Quintana y dexar al contrariu n’evidencia. El PSOE va facer como que reforma, pero pa dexalo too lo más asemeyao posible a como ta agora. El PP va xugar a la reforma de mínimos, pero siempre pa poner n’evidencia al PSOE, y rezando con qu’estos nun digan que sí, porque sinón habría que recular. IU va xugar a tar na procesión y repicando, desixendo, pretendiendo que l’asturianismu social vaiga al rau d’ellos na reivindicación autonomista, pa depués volver sumisu a la redolada del PSOE cuando la reforma entre en vía muerta y seya la hora de xugar fuerte. Esto ye igual que si depués del golpe de Riego de 1820 los lliberales dexaren el gobiernu en manes de los absolutistes.

El casu ye que’l trieniu lliberal acabó en 1823 per aciu d’una invasión militar, la de la Santa Alianza (una OTAN del primer terciu del XIX), y Riego y la Constitución de 1812, La Pepa, fueron achuquinaos nel patíbulu. ¿Ye esi el destín que-y espera a la futurible reforma? Ye posible, cola diferencia de que nun fai falta que venga la Santa Alianza. Yá tán gobernando: los “100.000 fíos de San Lluís” son los 45 diputaos de la Xunta.

Contestar

Deberíes tar autentificáu pa poder comentar.

Actualizaciones recientes

Comentarios más recientes