Faustino Zapico

Información

Esti artículu ye del 14 Mar 2010, y ta dientro de la sección Les Noticies.

Etiquetes pa esta entrada

, , , , ,

Salvadores

Francisco Álvarez CascosSilvio Berlusconi entró en política pa que nun lu metieren presu mediaos de los años noventa: les sos rellaciones colos escándalos del Partíu Socialista Italianu yeren una menacia que conxuró por elevación: entamando un partíu sofitáu nel so imperiu mediáticu, vertebrar una derecha ensin complexos y ganar les elecciones, cosa que-y permitió facer tovía más negocios y percanciar la impunidá. Quien se presentó como salvador d’Italia ye en realidá un home salváu pola política. Si dexa de ser diputáu, va presu.

Nun fai falta dir tan lloñe como Italia pa ver casos asemeyaos, onde la política ye’l salvavides de quien pretende presentase como salvador. Álvarez Cascos entamó la pior crisis política de l’autonomía asturiana en 1998, pretendiendo arreblagar perriba’l gobiernu electu, provocando la francedura del PP y la parálisis parlamentaria per más d’un añu nuna Xunta Xeneral que nin siquier podía disolvese gracies a la llaceriosa reforma estatutaria qu’ellos mesmos y el PSOE acababen de roblar. Depués, en 1999, la FSA y Areces ganaron les elecciones y entamó la nueva etapa del réxime del PRI asturianu, onde los cuatro años de Marqués nun foron otro qu’un paréntesis.

Agora resulta que quien provocó esa crisis ta siendo tentáu pa que se presente como salvador del país asturianu. Depués d’años alloñáu de l’actividá política, y en mediu de rumores sobre les ramificaciones del casu Gürtel, del que Cascos tendría muncho que responder como secretariu xeneral del Partíu Popular per tantu tiempu, agora resulta qu’hai sectores del so partíu que quieren que vuelva a Asturies, yá que con Ovidio Sánchez tiren con pólvora moyao. Salvase del xuez metiéndose a salvador. La pena ye que pa salvar al PP va tener qu’achuquinar a mediu partíu, entamando pela agrupación que lu vio nacer a la política, la de Xixón. Salvadores a la fuercia. Salvadores con salvavides.

Contestar

Deberíes tar autentificáu pa poder comentar.

Actualizaciones recientes

Comentarios más recientes