Faustino Zapico

Información

Esti artículu ye del 10 Jan 2012, y ta dientro de la sección L'Arcu de Texu, Les Noticies.

Etiquetes pa esta entrada

, , , , , , ,

Ruxerux

Ruxíase dende va selmanes y a la fin confirmóse: Luís de Guindos, antigu executivu de Lehman Brothers, esos xenios de la economía que dos meses anantes de qu’entamara la recesión falaben de les bones perspectives del capitalismu mundial, ye’l nuevu ministru de Facienda. Asina, ún de los principales responsables, por acción y por omisión, de l’actual crisis, ye’l guardián de les perres públiques.

Ruxíase dende va meses y a la fin confirmóse: les promeses de Rajoy de nun xubir los impuestos queden pa prau y l’axuste va ser mayor de lo que s’anunciaba “porque los socialistes dexáronlo too muncho pior de lo qu’esperábemos”. Igual táctica qu’en Castiella-La Mancha. Escaezse que la mitá del gastu públicu cuerre a cargu de les autonomías, onde gobierna’l PP nes más d’elles. Si l’AVE interior de Castiella-La Mancha o’l Muselón ye marafundiu del PSOE, l’aeropuertu de Castellón yelo del PP, y eso hai que pagalo. Agora recórtense les inversiones y la comunidá más perxudicada ye Asturies. Cascos quéxase agora, pero hai menos d’un mes el diputáu de FAC votó de baldre la investidura de Rajoy. ¿Quién-y mandó?

Ruxíase dende va años y a la fin confirmaráse. Depués de tres décades de neolliberalismu n’Europa occidental, lo único que queda por privatizar son la sanidá pública, la educación y les pensiones. Aznar ensugó bona parte del déficit acabando de malvender lo que yá entamara González nos sos caberos años, como CAMPSA o Telefónica. Agora, solo subiendo los impuestos a les rentes del trabayu nun van poder. Queden los recortes a la portuguesa, onde l’añu pasáu pagaben 9’60 euros por cada visita al serviciu d’Urxencies y pa esti añu fálase de 90. Queden los conciertos cola escuela privada, subvencionando con perres públiques negocios privaos. Queda obligar a cada ciudadanu que puea pagalo contratar un plan priváu de pensiones. Mentanto, los ricos nun paguen impuestos, y siguen ensin ruxise que lo fagan.

Contestar

Deberíes tar autentificáu pa poder comentar.

Actualizaciones recientes

Comentarios más recientes