Faustino Zapico

Información

Esti artículu ye del 25 Feb 2009, y ta dientro de la sección L'Arcu de Texu, Les Noticies.

Etiquetes pa esta entrada

, , ,

Reelección y democracia

Hugo Chavez, VenezuelaPartiendo de que quien esto escribe ye partidariu de pone-y llendes a los mandatos pa torgar no posible caudillismos y clientelismos, y que’l fechu de qu’un movimientu tenga nuna figura carismática la so mayor fortaleza ye tamién una amuesa de debilidá, nun dexa de sorprender el tratamientu mediáticu al procesu electoral vivíu en Venezuela hai unes selmanes, onde s’aprobó por clara mayoría la reforma constitucional que permite a alcaldes, gobernadores y presidentes presentase a les elecciones toles veces que-yos paeza. Lleendo “El País”, “El Mundo” o viendo les canales de TV, falando de “perpetuase nel poder” too paecía que Chávez quería una reforma constitucional pa quedar de presidente vitaliciu. Visto lo visto, tamién Chaves, Areces, Camps, Chirac o Berlusconi deben ser dictadores por ganar unes elecciones más de dos veces.

Chávez ye, ciertamente, un bocachancla, y les sos formes nun son precisamente les más prestoses, pero qu’un presidente caiga mal o bien nun pue ser nunca por sí sola razón abonda p’apoyar o atacar el procesu políticu que vive un país, y lo que Venezuela vive dende hai diez años ye una revolución democrática que nun tien equivalencia nenguna con cualesquier otru procesu históricu reciente, sacante la esperiencia chilena de 1970-73. Calificar a Chávez de dictador y esmolecese polos derechos humanos en Venezuela, un país onde nun hai presos políticos y la llibertá d’espresión –y de llevantu- ye absoluta, y callar como afogaos colo que ta pasando en Colombia nun dexa de ser un espectáculu indecente. Nin el PSOE nin el PP abrieron la boca por aquella Venezuela del Pautu de Puntofijo, onde los socios d’estos dos sometieron al país a una dictadura silenciosa onde’l fraude electoral, les desapaiciones y la violencia estructural yeren más que frecuentes. ¿Vendrá Luis Herrero d’observador electoral a les prósimes elecciones asturianes?

Contestar

Deberíes tar autentificáu pa poder comentar.

Actualizaciones recientes

Comentarios más recientes