Faustino Zapico

Información

Esti artículu ye del 08 Jan 2001, y ta dientro de la sección La Voz de Asturias.

Etiquetes pa esta entrada

, , , ,

Problema inversu

Pal Bloque de la Izquierda Asturiana (BIA) la inmigración y la emigración son les dos cares d’una mesma moneda, la d’un modelu económicu que nun ye quien a apurrir medios de subsistencia a pueblos enteros. Asturies vien siendo, a lo llargo de la so hestoria, receptora y emisora de movimientos migratorios: decenes de miles de paisanos nuestros tuvieron que colar d’esta tierra pa ganase la vida n’América o Europa a lo llargo d’esti sieglu, lo mesmo que decenes de miles d’inmigrantes fueron viniendo a vivir y trabayar ente nós.

El BIA defende el principiu de puertes abiertes. En rialidá, defendemos la llibre circulación de persones muncho más que la de capitales. Proponemos l’abolición de l’actual Llei d’Estranxería, la llegalización de los inmigrantes indocumentaos y la persecución de los abusos llaborales hacia esti colectivu. Apostamos pol mestizaxe activu y les polítiques d’integración que permitan el mantenimientu de la identidá cultural de les comunidaes que vengan a asitiase n’Asturies. Únicamente dende’l caltenimientu de les identidaes estremaes ye dable un auténticu mestizaxe. Lo otro ye asimilación. Asturies yá sufrió, y ta sufriendo, asimilación cultural de sobra como pa facer con otres cultures lo que se ta faciendo cola nuestra. La identidá asturiana nun ta amenazada pola inmigración, sinón pol españolismu cañí. El paru nun lu provoquen los inmigrantes, sinón el modelu económicu. Los inmigrantes nun molesten. El sistema sí.

Oficina de Extranlería, Subdelegación del GobiernoEn tou casu, dende’l BIA queremos señalar que la inmigración nun ye un problema especialmente importante n’Asturies. El que tenemos ye más bien el contrariu. Con un modelu económicu en decadencia, ensin alternatives reindustrializadores, con unes polítiques neolliberales que provoquen una fonda desestructuración social, la tendencia demográfica ye la de perder habitantes. Si los estudios oficiales falen de que n’Asturies sobra un terciu de la población, habrá qu’apostar por un nuevu modelu social y económicu, y non mantener un infame comederu que xenera una Asturies improductiva y parasitaria. Un modelu económicu autocentráu, autoxestionáu y ecolóxicamente sostenible. Solo asina seremos a evitar que les nueves xeneraciones tengan que colar d’Asturies. ¿Quién va vinir entós a un país que nun ye a mantener a la so xente?

Contestar

Deberíes tar autentificáu pa poder comentar.

Actualizaciones recientes

Comentarios más recientes