Faustino Zapico

Información

Esti artículu ye del 10 Oct 2010, y ta dientro de la sección L'Arcu de Texu.

Etiquetes pa esta entrada

, , , , ,

Piquetes

Piquetes informativos na puerte d'una gran superficieYá pasó la fuelga xeneral, más xeneral de lo que munchos pensaben incluyendo quien esto escribe, con tola recatafila de tópicos, frases feches y llugares comunes. Que si’l gobiernu tien d’escuchar el clamor popular y rectificar, dicen CC.OO. y UGT; que si la fuelga fo un fracasu evidente, diz la prensa de dereches; qu’hai que tener poca chapeta pa convocar una fuelga en tiempu de crisis, diz la patronal; que si les fuercies del orde garantizaron el derechu al trabayu, diz el gobiernu. Pero ente toles frases feches, medies verdaes y mentires completes rescamplen les declaraciones d’esi gran empresariu, modelu d’eficacia xestora, honestidá y sinceridá, Díaz Ferrán, que diz qu’a la fuelga nun foi naide, y los que fueron, fexéronlo única y esclusivamente porque los obligaron. ¿Quién? Los piquetes malonos, formaos por lliberaos a sueldu del gobiernu.

Ye yá vezu falar en toles fuelgues de la presión de los piquetes, y siempre qu’hai una convocatoria como la del 29-S apaecen escenes na televisión de probes trabayadores obligaos a facer fuelga pola violencia sindical, que nun respeta’l derechu al trabayu. Y el casu ye que violencia, lo que se diz violencia, siempre sal del mesmu llau: de la policía y de los esquiroles enraxonaos. Que naide escaeza que los únicos feríos d’esta fuelga xeneral punxéronlos los piquetes, incluyendo una muyer que sigue n’estáu de coma.

De lo que nun se fala nunca nes tertulies televisives o radiofóniques, o nes columnes de la prensa diaria, ye del otru piquete, el de verdá, el patronal. ¿Cuántos trabayadores, el 29-S y en toles fuelgues anteriores, fueron a trabayar por mieu al despidu, mazcaráu de non renovación del contratu? ¿Cuántos trabayadores, especialmente nes grandes cadenes comerciales, taben nel so puestu naguando porque llegaren los piquetes a echalos p’asina facer la fuelga ensin mieu a les represalies patronales? A esi piquete ¿Quién lu xunce?

Contestar

Deberíes tar autentificáu pa poder comentar.

Actualizaciones recientes

Comentarios más recientes