Faustino Zapico

Información

Esti artículu ye del 18 Oct 2011, y ta dientro de la sección L'Arcu de Texu, Les Noticies.

Etiquetes pa esta entrada

, , , , ,

Niemeyer

Centru Niemeyer como espeyu de lo que ye Asturies, la cultura asturiana y la concepción de la mesma que tien bona parte de la clase política. 95 millones de gastu nuna construcción que, queriendo imitar el papel que’l Guggenheim xugó pa Bilbao, faga d’Avilés una capital cultural de primer orde. Hasta ehí, mui guapo.

El Guggenheim sirvió pa poner nel mapa una ciudá como Bilbao, frayada por años de reconversión industrial. El gobiernu vascu fexo un apueste que consistió en facer una obra arquitectónica llamativa y de prestixu p’agospiar expresiones artístiques de minoríes y mui elitistes pero que, al servir pa prestixar la ciudá, punxo en valir tolo qu’ella tenía, siendo amás un escaparate de la cultura y la historia vasques. Quien va a Bilbao nun va solo al Guggenheim, va pa conocer Vasconia.

Equí, cola concepción faltosa qu’anima los políticos asturianos, el Niemeyer talántase como una forma d’amosar que n’Asturies yá tamos na “modernidá”, que pa esta xente consiste n’arrenunciar a tolo que güela a cultura asturiana, y facer una programación lo más cosmopaleta y elitista posible, y, de paso, dar trabayu, piensu o comederu a los adictos. ¿Quieren los sos promotores facer del Niemeyer un escaparate d’Avilés y d’Asturies, con tolo qu’ello implica, o fáenlu p’amosar que n’Asturies yá nun somos asturianos? Artículos y declaraciones como eses que contraponen “Shakespeare y talentu” a gaita y madreñes amuesen a les clares esa concepción fondamente tarasca de lo que ye esti país, queriendo facer xusto lo contrario.

Que’l conseyeru de Cultura diga que nun ye normal que nel centru Niemeyer se gasten 95 millones y nel prerrománicu 5, cuando’l primeru tienlo too por amosar y el segundu ye padremuñu de la humanidá, ye la simple constatacón d’un fechu. Que los estómagos agradecíos se-y echen encima ye la prueba de la “cultura” que defenden estos cosmopaletos de 2ª B.

Actualización 23/10/2011: Recomiendo la llectura de Carta incómoda a Oscar Niemeyer, de Blas Fernández Gallego publicada en LNE’l 11/10/2011. Ye cenciellamente brillante.

Contestar

Deberíes tar autentificáu pa poder comentar.

Actualizaciones recientes

Comentarios más recientes