Faustino Zapico

Información

Esti artículu ye del 25 May 2012, y ta dientro de la sección Artículos, L'Arcu de Texu.

Etiquetes pa esta entrada

, , , ,

Murniu 25 de mayu

Bien ye verdá que del 25 de mayu de 1808 hasta esti de 2012 Asturies pasó per momentos mui revesosos, onde’l futuru paecía mui prietu y nun se yera a ver la lluz a lo cabero’l tunel. Bien ye verdá qu’a la mio xeneración, la del baby-boom, nun-y tocó vivir una guerra civil o una dictadura, pero dende que tengo memoria política, y la mía entama’l 1º mayu de 1982, nun recuerdo un 25 de mayu onde los ideales que representa esa fecha apaezan más lloñe d’algamar.

Cuando en 2008 salió’l mio llibru La revolución de 1808 o l’aniciu de la Historia Contemporánea d’Asturies, alcuérdome que, cuando me tocó dar delles charres y presentaciones de la obra, siempre comparaba la dirixencia política de 1808 cola actual, y comentaba que, de dase anguaño una situación asemeyada a la qu’había daquella, anantes de ver a Javier Fernández, Areces o Ovidio Sánchez faciendo de Flórez Estrada, imaxinábalos más combayando colos Bonaparte. Ente les munches diferencies ente l’Asturies de 1808 y la de 2012, rescampla más que nunca l’ausencia dafechu d’una dirección política consciente del país nel que vive y la so potencialidá. De ver a Flórez Estrada encarando al amu d’Europa, de Lisboa a Moscú, a ver a Javier Fernández alvirtiendo de que’l d’él nun va ser nunca un gobiernu insubmisu a Madrid (como si pudiéremos esperar otra cosa d’él), queda a la fin una sensación de tristura, de fracasu históricu colectivu, más que margoxa.

El 25 de mayu de 1808 una Xunta Xeneral, previu llevantamientu popular, asumía la soberanía del país asturianu, declaraba la guerra a Francia, entamaba la constitución del Exércitu Defensivu Asturianu, inventaba la bandera y unviaba embaxadores a Gran Bretaña a pidir una alianza militar. La empresa yera suicida, porque qu’un paisucu sucursalizáu de menos de 400.000 habitantes s’atreviera a dici-y que non a los amos d’Europa cuando otros muncho más poderosos taben acabantes de fincar la rodiya nun paecía precisamente prudente. Pero fexéronlo. Y gracies a qu’ellos lo fexeron, otros, primero na monarquía hispánica y depués en tol continente, acabaron faciendo lo mesmo. Y ganaron. Nun foron los asturianos, ciertamente, los que derrotaron a Napoleón. Nin siquier fueron a torgar les dos invasiones que sufrió Asturies, y l’EDA cayó derrotáu más d’una vuelta xunta’l restu del exércitu patriota, pero n’Asturies dióse’l primer glayíu de llibertá nun continente onde les tropes franceses llegaben hasta’l Canal de la Mancha. Y, gracies a eso, vencieron.

Güei, 25 de mayu de 2012, una Xunta Xeneral apoderada por una clase política cobarde y mazcaya escueye un presidente que reniega d’Asturies y lo asturiano, qu’asume’l discursu de l’austeridá y los recortes con un servilismu indecente y que, con que lu dexen asumir la presidencia, ta dispuestu a achuquinar los conceyos asturianos y a los que nellos viven. Nun podía haber pior homenaxe a la Xunta Xeneral de 1808 nesta Xunta de 2012 dispuesta a facer cualisquier felonía a cambiu de que nun los intervenga Madrid. En cuenta de declarase insubmisos, de negase a aplicar los axustes indecentes que faen pagar a los ciudadanos les deldes de banqueros y especuladores, finquen la rodiya y prometen más sacrificios… na nuestra cabeza.

Persabemos qu’encarase con Madrid, con esta puxarra d’autonomía que tenemos, pué acabar con intervención. ¿Nun lo tamos yá? ¿Qué pasaría si’l gobiernu asturianu se niega a asumir los recortes? ¿Nun podría pasar lo mesmo n’otres partes de la UE? ¿Qué sería lo pior? ¿Qué trancaren la Xunta Xeneral? ¿Quién diba notalo? ¿Nun diba salir esti pueblu a la cai detrás d’un gobiernu dignu? ¿Acasu nun ye posible otru camín?

Nun mos engañemos. Por muncho que celebremos, y bien poco lo facemos, l’espíritu de los asturianos de 1808 nun ta güei n’Asturies. Ta n’Islandia.

Un comentariu

  1. [...] mayo solo es celebrado de algún modo por colectivos y personalidades asturianistas. Uno de ellos, el historiador Faustino Zapico, llega a una conclusión: el espíritu de aquella Asturias insurrecta de 1808, ahora está en [...]

Contestar

Deberíes tar autentificáu pa poder comentar.

Actualizaciones recientes

Comentarios más recientes