Faustino Zapico

Información

Esti artículu ye del 06 Jun 2010, y ta dientro de la sección L'Arcu de Texu, Les Noticies.

Etiquetes pa esta entrada

, , ,

Mundu al revés

Sindicatos, gobiernu y patronalSi el “rialismu máxicu” ye una criación lliteraria llatinoamericana, el “surrialismu prosáicu” yelo de la política asturiana. Solo asina pue entendese que salga’l presidente de la FADE, Severino Vigón, diciendo que nun ye malo que’l TAV namás llegue hasta La Pola L.lena, qu’un tunel de venti kilómetros pela Cuenca del Caudal ye una barbaridá ambiental, amás de carísima, y que nun ye plan de gastar miles de millones nuna obra asina. La patronal asturiana, creyente y sacerdotisa del mitu del progresu, siempre partidaria de toles obres d’estroza ambiental, vuélvese agora ecoloxista. Toi seguru que les razones de Vigón pa oponese al TAV hasta Uviéu y Xixón nun son precisamente l’amor pola naturaleza, pero seyan eses o non, tien más razón qu’un santu. El TAV hasta La Pola ye de sobra.

Pero más surrialista tovía ye que salga Antonio Pino, secretariu xeneral de CC.OO. d’Asturies, diciendo xusto lo contrario: que l’AVE tien de llegar hasta la costa, que lo del tunel ta mui bien porque da munchu trabayu, y qu’Asturies nun ta pa renunciar a inversiones. El sindicalismu presuntamente de clase al serviciu del desarrollismu más porcaz. ¿Nun xeneraría más empléu invertir esos millones del tunel n’actividá productiva sostenible nel tiempu? ¿Nun-y valió a CC.OO. con obres que namás se xustifiquen en sí mesmes, como’l Muselón?

Y pa rematar el surrialismu, apaez la FSA, qu’aplaudía coles oreyes un TAV hasta Xixón, diciendo que Vigón tien razón, que vaya valiente que ye por dicilo y que yá valió d’estroza ambiental. Nótase que tienen que xustificar la conxelación de la inversión estatal n’infraestructures, pero en tou casu, benditu ecoloxismu de pega’l de la sucursal asturiana del PSOE. La FADE y el PSOE defendiendo’l mediu ambiente de Les Cuenques. CC.OO. defendiendo cualisquier cosa si trai perres, anque seya pan pa güei y fame pa mañana. Mundu al revés.

Contestar

Deberíes tar autentificáu pa poder comentar.

Actualizaciones recientes

Comentarios más recientes