Faustino Zapico

Información

Esti artículu ye del 15 Apr 2011, y ta dientro de la sección L'Arcu de Texu, Les Noticies.

Etiquetes pa esta entrada

, , , ,

Memoria

Paloma Sainz, Vicente Álvarez Areces, Javier FernándezXueves, 14 d’abril. Actu d’homenax na fosa común d’Uviéu a les víctimes de la represión faxista na guerra y na posguerra civil. Asistencia, un cientu persones, como tolos años más o menos. Los discursos, como tolos años más o menos. La emoción y el recuerdu, como tolos años más o menos. Lo que nun foi como tolos años más o menos ye la presencia de Paloma Sainz, candidata del PSOE a l’alcaldía d’Uviéu, qu’aterrizó con bona parte del staff de la FSA a retratase (mui oportuna la presencia de la TPA) echando flores a la fosa, como si-y importara daqué lo qu’ellí se celebra. Nun pinten bien les perspectives electorales esti añu pal PRI asturianu y hai que facese ver perdayures, incluso nos sitios onde nunca se foi, a ver si s’arraña dalgún votucu, que nunca sobren.

El partíu que llegalizó la dictadura, arrenunciando nel so momentu -con otros, como’l PCE de Carrillo- a la persecución y esclariamientu de los sos crímenes, y aprobando trenta años depués una mal llamada llei de memoria histórica que nun anula, y polo tanto lexitima, la lexislación franquista, quier sacase la semeya homenaxeando a los defensores d’aquella república del 14 d’abril. Los mesmos qu’apoyen la monarquía posfranquista. Los mesmos que lexitimen a los asesinos, echen flores a les víctimes, munches d’elles del so partíu. ¿Nun dicía Javier Fernández qu’había que rescatar los valores republicanos, “polo demás compatibles dafechu cola Constitución de 1978?

El 27 de xineru, aniversariu de la lliberación d’Auschwitz, ye en toa Europa el día de la Memoria. En tolos centros escolares hai, obligatoriamente, actos, clases, esposiciones, conferencies, qu’ayuden a recordar lo que foron les matances faxistes. ¿Pa cuándo un día de la memoria nesti país nuestru, anque namás seya pa que se retraten los politicos asturianos? Bien ye verdá que nesti tema, ente la hipocresía del PSOE y el silenciu obviu del fíu del “Cunetes”, nun se sabe qué ye pior.

Contestar

Deberíes tar autentificáu pa poder comentar.

Actualizaciones recientes

Comentarios más recientes