Faustino Zapico

Información

Esti artículu ye del 21 Mar 2013, y ta dientro de la sección Artículos, Blogue, L'Arcu de Texu.

Etiquetes pa esta entrada

, , , , ,

L’error González

Non, nun voi ser tan pedante como pa poneme en plan Ortega y Gasset, autor qu’amás nun me presta nada, cuando fexo aquel históricu artículu en payares de 1930 nel diariu El Sol refiriéndose al xefe del gobiernu español, xeneral Dámaso Berenguer. El títulu del artículu, “El error Berenguer” dicía espresamente que nun se falaba d’un error de Berenguer, sinón que Berenguer, la so propia persona, yera l’error. Nesti casu, el d’Ángel González y Izquierda Unida, l’error ye doble.

Ángel González, anguaño portavoz parlamentariu d’IU na Xunta Xeneral, ta imputáu por presuntes irregularidaes na contratación de monolitos pa les foses comunes de la represión franquista, fecha en 2010 cuando yera viceconseyeru de Bienestar Social nel caberu gobiernu d’Areces. Nun ta acusáu de quedase con perres o de facer una contratación a deu pa favorecer a los sos amigos, sinón d’incumplir la llei al facer una contratación por una cantidá mayor de la permitida con un procedimientu propiu d’otres actividaes. Nun ye polo tanto un casu de corrupción sinón de prevaricación, yá que fuera alvertíu de qu’esi procedimientu nun s’axustaba a derechu y incumpliólu a costafecha pa nun dilatar nel tiempu la colocación de los monolitos.

Agora bien, incluso sabiendo que nun tamos falando de casos comparables al Marea o al Niemeyer ¿Ye razonable qu’Ángel González anecie en facer como si nun pasara nada y nun asumir les responsabilidaes polítiques que la so formación sí desixe a otros partíos cuando tienen imputaos nes sos files? ¿Y ye razonable que la propia IU zarre files detrás del so portavoz parlamentariu, asumiendo d’equí en delantre que cuando se-yos llene la boca falando de la corrupción de los partíos turnistes, la que yá se descubrió y la que rescamplará, van poder echa-yos en cara que nada menos que’l so portavoz ta imputáu por un delitu de prevaricación y sigue nel so puestu?

IU acaba de perder l’autoridá moral que-y quedaba. La política perdiérala cuantayá cuando entró nos gobiernos d’Areces y aplicó los retayos que-y desixía’l gobiernu central y el propiu PSOE. La moral conservávala en tanto qu’IU nun apaecía, polo menos de momentu, chiscada polos casos de corrupción que van saliendo na política asturiana. Nesi sentíu, los sos militantes podín sacar pechu y dicir qu’ellos nun yeren como’l PSOE y el PP, y neso tenín razón. Pero agora, con una sola decisión, la del Conseyu Políticu d’IU d’Asturies decidiendo por amplia mayoría conservar a Ángel González nel so puestu, yá non. La imputación ye una llábana que va pesar nesa organización nun momentu clave, el de la deslexitimación del réxime, el del desprestixu conxuntu de los partíos turnistes, PSOE y PP. Cuando taben xubiendo nes encuestes y nun paez imposible’l famosu sorpasso del que falaba Anguita nos años noventa esti casu, y sobre too esti comportamientu, sirve pa da-y ales a UPyD. Colo fácil que yera dimitir de tolos cargos públicos, quedar como cuadru internu del partíu y, si los tribunales tomaben un determín favorable, volver sacando pechu. Pero non, pudo más l’instintu de conservación de González y la casta que lu arrodia.

Una pena. Una llaceria. Non solo pa IU, cosa qu’en tou casu namás importaría a los sos militantes y votantes, sinón pa toa Asturies, porque tolo que valga p’apurri-y munición a UPyD nesti momentu históricu ye una frivolidá imperdonable. Doble error, polo tanto: el de González negándose a dimitir de tolos sos cargos, y el d’IU, que comete l’error González, esto ye, dar por bono que lo que ye desixible –y con razón- a los demás nun val cuando ye pa los de casa. Igual podemos rematar esti artículu parafrasiando a Ortega: ¡Asturianos, la vuestra esquierda nun esiste! ¡Reconstruyila!

Contestar

Deberíes tar autentificáu pa poder comentar.

Actualizaciones recientes

Comentarios más recientes