Faustino Zapico

Información

Esti artículu ye del 27 Jun 2011, y ta dientro de la sección Artículos, IAS.

Etiquetes pa esta entrada

, , , , , , , , , , , ,

La larga marcha, reflesiones de va once años

Esti artículu, con esti mesmu títulu de La Llarga Marcha publicóse nel númberu 1 d’ALANTRE, periódicu fallíu d’Izquierda Asturiana (IAS) el 1º mayu de 2000, anque taba escritu d’unos meses anantes. Dao que fala de coses bien actuales, tanto no que toca al propiu asturianismu como de movimientos sociales como’l presente 15M, póngolu equí como recordatoriu de que, va años, dende IAS yá falábemos de coses bien presentes anguaño. Incluso de los errores, que, en gran midida, llevamos años cometiendo.

Anque con esti títulu corramos el riesgu de ser calificaos de neomaoistes (coses piores se dixeron del nuestru partíu), si tuviéremos que definir brevemente cuála ye la estratexa pa entamar el procesu d’acumulación de fuercies que permita algamar fondes tresformaciones nel nuestru país, la única respuesta razonable sería esta: la llarga marcha.

Asturies, que tien güei el duldosu honor de ser la comunidá autónoma con mayor tasa de paru de tol estáu y con mayor paru xuvenil de tola UE, sufre güei les consecuencies de nun tener un proyectu políticu propiu que, dende una perspectiva nacional y de clase, dibuxe una alternativa seria y realista al actual modelu sucursalista y clientelar del que participe cásique tol mapa políticu.

El nuestru país llegó a l’apertura política –mal llamada transición democrática- que vieno en morriendo’l xeneral Franco ensin una esquierda centrada na problemática rial del país. La FSA-PSOE y el PCE entregáronse a la reforma y a l’aceptación de la monarquía y el status quo, y el fracasu del PSPA y de la Unidá Rexonalista demostraron la incapacidá de la esquierda estatalista pa llevantar un proyectu afayáu a la rialidá asturiana. La rotura democrática acabó en reforma, l’autodeterminación y el federalismu n’autonomía de 3ª y la socialización de los medios de producción en Pautos de la Moncloa y “solidariedá p’acabar cola crisis”.

Depués vinieron los gobiernos del PSOE, y con ellos la perda de la inocencia: la OTAN, los GAL, la reconversión, la corrupción, el comederu, la prepotencia, el discursu neolliberal, la estética posmoderna, el sucursalismu… mientres la esquierda nun yera a articular una respuesta con un PCE sucursalizáu, dividíu y convertíu nel hermanu menor del PRI felipista y una esquierda nacionalista ensin discursu nin estratexa.

Sicasí, la gran derrota de la esquierda asturiana nun vendría hasta los primeros años noventa. La fuelga xeneral del 23 d’ochobre de 1991 tuvo la gran virtú de poner a la sociedá asturiana delantre d’un espeyu. Bona parte de la mesma cayó na cuenta de que, dende había años, Asturies nun yera económicamente viable. El modelu de desenrrollu económicu impuestu nesti país dende había un sieglu, basáu na industria pesada-estractiva, taba dando les boquiaes y yera preciso pasar a otru modelu. L’ausencia de poder políticu pa encarar la situación dende Asturies y el procesu d’aculturización apaecín como torgues que yera necesario baltar. Yera’l momentu de dibuxar una alternativa qu’axuntara la necesidá de renovación y redefinición de la esquierda cola necesidá d’afayar esi discursu a la rialidá asturiana. Yera’l momentu de pasar a la ofensiva contra’l modelu neolliberal, sucursalista y clientelar que llevara Asturies a la situación na que s’atopaba. Yera posible. Yera necesario. Pero nun se fexo.

En cuenta d’apostar por abrir una resquiebra nel modelu neolliberal y sucursalista, la esquierda asturiana apostó pola anestesia social. Los pautos firmaos, les prexubilaciones, los fondos mineros, les subvenciones europees, tenín y tienen como únicu oxetivu facer menos doliosu el procesu de destrucción del texíu económicu: les desixencies de la globalización y la integración europea diéron-y el remate a un modelu de desenrrollu qu’entamó a fundir na crisis nos años ’50, que ye cuando se da la gran deserción del capital priváu n’Asturies.

La crisis de los primeros ’90 foi una oportunidá perdida, y tovía tamos pagando les consecuencies: el vieyu modelu ta dando les boquiaes, pero nun hai capacidá na clase política pa diseñar un modelu alternativu que puea mantener el sistema de dominación y la dependencia económica y política. La única solución que toparon foi apurrir perres p’anestesiar a la población y retrasar un españíu social o, cuando menos, una fonda crisis de lexitimidá de les opciones polítiques dominantes. Asistimos dende hai ocho años a un auténticu sobornu colectivu, nel que la llamada aristocracia obrera, esto ye, los trabayadores especializaos, especialmente de la industria pesada, aceptaron –previu adoctrinamientu de les burocracies sindicales- un fatáu de perres a cambiu d’aceptar la destrucción de l’actividá productiva. N’otres palabres: más perres pa los padres a cambiu de que nun heba trabayu pa los fíos.

¿Qué va pasar n’Asturies cuando les prexubilaciones se conviertan en xubilaciones? ¿Qué va pasar cuando en cuestión de seis o siete años dexemos de tar nel primer y tercer puestu del Estáu en pensiones y salarios respectivamente? ¿Qué va pasar cuando la UE corte’l grifu y dexen de venir los fondos de cohesión que nun se tán usando en rexenerar l’actividá productiva sinón en caltener una inmensa rede clientelar y un rentable votu cautivu? ¿Qué van facer los fíos de los prexubilaos cuando se vean con trenta años y ensin trabayu o con ún eventual y mal pagáu? ¿Qué van dicir entós el PSOE, el PP y IX? Y, lo que ye más importante ¿Qué va facer la esquierda alternativa?

Porque lo realmente dolioso de la situación d’Asturies nun ye solo qu’esti país siga morriendo adulces. Nun ye sólo que les alternatives que la clase política diseña pa esti país pasen per más destrucción del ecosistema y pela emigración masiva de más d’un terciu de la población asturiana. Nun ye sólo que seyamos el principal esportador en tol Estáu de mano d’obra especializao. Nun ye sólo que la llingua asturiana siga reculando y la cultura asturiana asimilándose nesi magma alienante de la España cañí. Lo malo, lo pior, ye que tovía nun fuimos quien a diseñar un modelu alternativu a eso. Porque los que tenín la obligación de facelo nun quixeron. Y los qu’empiecen agora a ser conscientes de la situación tovía nun tienen les ferramientes amañoses pa tala empresa.

Esa xera correspondería-y, principalmente, al movimientu asturianista, entendiendo por asturianismu el conxuntu de les organizaciones sociales y polítiques que nun tienen dependencia esterior y que defenden nos sos respectivos ámbitos d’actuación un proyectu que tien al pueblu asturianu como únicu suxetu decisoriu. Pero la espresión político-electoral d’esi movimientu ta
tovía mui verde.

Si el fracasu de la UR y el PSPA demostraron la incapacidá de la esquierda estatal p’articular un proyectu nacional asturianu, la llinia errática de la esquierda nacionalista vien a demostrar la so incapacidá nesa mesma xera. De 1976 p’acó sucediéronse les sigles: CNA, SPA, XNA, UNA, AA, IAS, INA… La escasa continuidá orgánica influyó enforma na incapacidá pa formar cuadros y ellaborar un discursu y estratexa coherentes. Esto suplióse con grandes dotes de voluntarismu, mimetismu y sectarismu, lo qu’afondaba tovía más les carencies yá mentaes.

Cualisquier observador de la evolución política de la esquierda nacionalista pue dase cuenta de qu’esa incapacidá pa formar cuadros y discursu, que mantenía al movimientu na marxinalidá, fexo que munchos de los llamaos “hestóricos” del nacionalismu políticu fueren cayendo nun oportunismu posibilista qu’en dellos casos llega a ser escandalosu. Húbolos qu’en cuestión de pocos años, incluso meses, pasaron del mimetismu babayu del abertzalismu radical a la derecha rexonalista. Húbolos tamién que pasaron de falar enraxonaos de socialismu y autodeterminación a defender les privatizaciones y la política neolliberal, mazcarada, eso sí, de conversión a la Tercera Vía.

Quiciabes esti oportunismu demuestre que’l nacionalismu asturianu nunca foi quien a pensar con cabeza propia, y por eso pasó tan alegremente per toles recetes polítiques posibles, dependiendo de per onde, o dende onde, soplaba l’aire.

La construcción del proyectu políticu socialista y soberanista ye, poro, una xera que lleva más de venti años retrasándose. Ye necesario encarar un doble procesu: el de redefinición del discursu y estratexa de la esquierda (¿Qué significa güei ser d’esquierda? ¿Qué ye ser socialista?) y el d’afayar esa esquierda a la rialidá asturiana (¿Por qué ye necesaria la soberanía nacional? ¿Qué gana el pueblu asturianu con ello?). Trátase, en definitiva, de criar una esquierda asturiana, d’articular un proyectu socialista dende, pa y pol pueblu asturianu.

Y pa ello lo primero de too ye consolidar la organización y el discursu, ellaborar una estratexa y ser coherente con ella. Sólo asina va ser posible presentase al pueblu asturianu con un mínimu de credibilidá. Naide apoya un movimientu que cambia de nome, discursu y estratexa cada dos años.

Pero afitar partíu y ellaborar discursu nun garantiza l’ésitu políticu, y muncho menos a curtiu plazu. El llabor del que tamos falando ta faciéndose nun contestu perduru de desmobilización y d’apatía política xeneralizada: les grandes dosis d’anestesia social vía prexubilaciones y fondos europeos tienen adormecida la conciencia de clase -y qué dicir de la nacional- y nun son abondos tres o cuatro años de propaganda esitosa pa empezar a cambiar les coses. Les condiciones oxetives son mui revesoses, y nun van cambiar, previsiblemente, nesta década.

Les inyecciones económiques de Madrid y Bruseles van permitir qu’esi gran comederu institucionalizáu que se llama Principáu d’Asturies tarde en ser cuestionáu en serio. Únicamente cuando se corte el grifu, y tovía queden dellos años pa qu’eso pase, pue empezar a cuayar un discursu como’l nuestru ente un sector significativu de la población, que podrá ser, previsiblemente, el formáu polos estratos más esplotaos y periféricos de la clase trabayadora: eventuales, paraos, emigrantes, xóvenes y muyeres.

El factor xeneracional va resultar de gran importancia. Hai un grupu d’edá, el formáu polos nacíos ente finales de los años ’60 y primeros ’70, que tien como característiques el ser la xeneración más numberosa de la hestoria d’Asturies -el famosu baby-boom del desarrollismu- y tamién la meyor preparada -con unos porcentaxes de titulaos superiores ente los más altos de la UE-. Ye esta una xeneración que nun conoció el franquismu, enforma despolitizada y que nun guarda por ello esa fidelidá canina hacia les opciones polítiques hestóriques: PSOE y PCE-IX.

Anguaño esti grupu d’edá ye mui conformista y individualista, pero va ser la primer xeneración d’asturianos contemporánios que viva pior que los sos pas. Los más numberosos, los meyor preparaos, los educaos pal ésitu, nun van tardar muncho en topase cola dura rialidá: o paru, o emigración, o trabayos eventuales, mal pagaos y mui per debaxo de la cualificación profesional que
tienen. Esa frustración d’espectatives, esi duru despertar, ye’l que pue xenerar una actitú de disidencia social y política pa col sistema. Ente esa xeneración, y ente les que vienen detrás, pues el
futuru ye igual de prietu pa toes.

¿Hacia ónde va empobinar la xeneración X cuando despierte pa la política? ¿Hacia la estrema derecha o hacia la esquierda democrática y radical? El puxu que la ultraderecha ta garrando en países como Francia, Italia, Austria o Bélxica tien que facenos pensar qu’Asturies nun ta inmune a ella: una sociedá desestructurada, aculturizada y con altes tases de paru ye terrén cucháu pa un proyectu populista basáu nun españolismu primariu y un discursu escluyente que canalice la frustración hacia los más débiles y non hacia los auténticos responsables de la situación.

Podemos dicir, ensin esaxerar lo más mínimo, que la llucha del movimientu de defensa de la llingua y la identidá asturianes ye clave pa desactivar el potencial del facismu na nuestra tierra: el que la mocedá asturiana garre conciencia nacional, que tenga como marcu referencial identitariu a Asturies y non al Estáu, ye indispensable pa que l’españolismu porcaz d’un GIL o una Democracia Nacional nun tenga una base ideolóxica. Por eso lluchar güei pola llingua asturiana ye ún de los llabores más progresistes que puen facese nesti país: porque ye lluchar pola llingua del pueblu y porque sirve pa prevenir el facismu.

Ye evidente que nun tamos en condiciones de quemar etapes. Ye evidente que tenemos que ponenos a facer lo que nun se fexo tovía. Que naide espere resultaos a curtiu plazu. Que naide mos desixa lo que nun se desixe a otros. Tocarános asumir los nuestros errores, pero non los de los que vinieron primero que nós. A nós tócanos facer de pioneros del futuru socialismu asturianu, lo mesmo qu’otros fueron hai agora un sieglu los pioneros del movimientu obreru nesti país. Tamos na Llarga Marcha. Na Llarga Marcha hacia’l futuru del nuestru pueblu.

[Artículu publicáu nel nº 1 d'Alantre, 1-V-2000]

Contestar

Deberíes tar autentificáu pa poder comentar.

Actualizaciones recientes

Comentarios más recientes