Faustino Zapico

Información

Esti artículu ye del 08 Jan 2011, y ta dientro de la sección L'Arcu de Texu.

Etiquetes pa esta entrada

,

La hora del bipartidismu

PSOE PP IU BipartidismuDe les munches conclusiones que puen sacase de les elecciones del 9 de marzu hai una que rescampla perriba de toes y ye’l reforciamientu del modelu bipartidista, tanto n’Asturies como n’España, nun momentu históricu en qu’esi modelu ta reculando en mayor o menor midida en tola Europa occidental. Pue echase la culpa al sistema electoral y a los medios de comunicación, y asina ye en gran midida, pero eso nun ye razón abonda pa desplicar cómo toles opciones que nun seyan PSOE y PP pierdan votos y escaños nestes elecciones o, nel meyor de los casos, queden como taben. Tamién va cuatro años dióse una bipolarización pergrande a consecuencia de los atentaos del 11-M y el resultáu, siendo’l más bipartidista hasta esi momentu, apurrió una cámara muncho más plural. La única conclusión positiva del resultáu del domingu ye que polo menos nun hai mayoríes absolutes.

El llamáu “votu útil” arrasó, y nun podemos saber cuantu d’esi votu masivu pal PSOE foi consecuencia directa del atentáu d’Arrasate y cuantu taba yá decidíu primero. En tou casu, les opciones a la esquierda del PSOE baxen de 18 a 8 escaños, toos ellos mecíos nel grupu mistu xunta Coalición Canaria y Rosa Díez. Les voces d’esquierda van tenelo más revesoso pa facese sentir nesta lexislatura, y el PSOE paez entamar un ciclu de reforciamientu gracies a que’l PP ta a mui poca distancia, lo que concentra tovía más el llamáu “votu útil” al rodiu de só, polo menos nes elecciones xenerales. El resultáu compromete gravemente’l futuru d’IU, non yá como alternativa política sinón cenciellamente como organización, llena de deldes y ensin un proyectu claru. Sigue’l complexu d’hermanu menor respecto al PSOE y ta claro que l’electoráu prefier a los primoxénitos.

¿Qué llectura facer de los resultaos n’Asturies? La primera ye qu’equí nun hai una dinámica electoral estremada del conxuntu del estáu. PSOE y PP sumen el 88% de los votos y repítese’l resultáu de 2004: 4-4 con IU fuera. Nin Gabino De Lorenzo foi a ganar… a Zapatero, yá que naide sabía que’l PSOE presentaba a Álvaro Cuesta por Asturies. Tán por ver les consecuencies qu’esti resultáu puen tener pa la vida política asturiana, tanto na dinámica parlamentaria na Xunta Xeneral -y eso depende de la llectura que faga IU del so resultáu electoral- como na reforma estatutaria viniente. Ta por ver tamién cómo evoluciona’l PCA, y en qué midida eso pue revolver el mapa políticu asturianu, y cuánto del guiñu asturianizante del PP nesta campaña queda pa prau o pasa a ser una estratexa consciente pa resorber los restos de la URAS y PAS, imprescindibles pal PP si quier ganar les próximes elecciones autonómiques.

Otra llectura evidente del resultáu asturianu ye’l fracasu claru de les opciones asturianistes, que saquen resultaos ridículos, especialmente la coalición UNIDÁ, de la que forma parte quien esto escribe. Podemos echa-y la culpa a la bipolarización, sobre too depués del atentáu, al comportamientu de los medios de comunicación, a que’l nome de la coalición tovía ta mui poco rodáu, y polo tanto la xente nun-y atribúi una etiqueta política definida… Too ello ye verdá, y de xuro qu’influyó abondo nel resultáu final, pero echar balones fuera nun ye nunca una bona opción depués d’un fracasu tan evidente. Anguaño, el suelu electoral de les opciones d’obediencia asturiana ye cuantitativamente irrelevante, depués de trenta años de nacionalismu organizáu. Ye evidente que se tán -tamos- faciendo munches coses mal y ye hora d’analizales y d’actuar en consecuencia. Fai falta un programa claru (¿qué Asturies queremos?), una estratexa clara (¿cómo vamos llegar a ello? ¿a qué sectores de la sociedá queremos llegar?), un compromisu claru (militantes, perres, medios) y fuxir tanto de maximalismos miméticos como del oportunismu demagóxicu. Hai que refundar l’asturianismu en base a la idea que tenemos d’esti país y lo que queremos que seya, y actuar en base a lo qu’hai, al nivel de conciencia de la sociedá asturiana, y non en base al que mos prestaría tener. Si facemos eso, y creo que sí se dieron pasos nesi sentíu, anque non abondos, taremos en condiciones de llevantar a medio plazu un proyectu curiosu y entendible por un sector ampliu de la sociedá asturiana. Sinón, tendremos más monocultivu PSOE-PP, con una IU ca vuelta más agustu nel papel de comparsa, y fuera d’eso la nada absoluta a nivel electoral, avanzando hacia un modelu como’l norteamericanu, con movimientos sociales y ciudadanos quiciabes fuertes pero güérfanos dafechu de representación política.

Nun podemos permitir que pase eso. Anque agora s’imponga un ciclu bipartidista, hai qu’entamar a llevantar los pegollos del tercer espaciu, que n’Asturies nun pue ser otru que l’asturianista. Porque esti país merez más que vese obligáu a escoyer ente los responsables de la escayencia económica, la estroza ambiental y la emigración masiva. Fai falta otra ferramienta política, y hai que construyila. Tovía.

Contestar

Deberíes tar autentificáu pa poder comentar.

Actualizaciones recientes

Comentarios más recientes