Faustino Zapico

Información

Esti artículu ye del 02 Aug 2013, y ta dientro de la sección Artículos, Blogue, Diagonal, L'Arcu de Texu.

Etiquetes pa esta entrada

, , , , , ,

La hora de les alternatives

Nun ye un secretu que la crisis económica abrió nel Reinu d’España otra más, la del propiu réxime nacíu de la restauración de 1975 y espeyáu nel marcu constitucional del 78. Cuando españó la famosa burbuya especulativa y entamaron los despidos masivos, cuando pasamos de la “desaceleración acelerada” al reconocimientu espresu de lo que mos venía encima, dos millones de paraos depués entamaron les movilizaciones, primero del sindicalismu alternativu, espeyáu n’Asturies na CSI, CGT, CNT y SUATEA, y depués de les grandes centrales, CCOO y UGT. El sindicalismu alternativu plantegaba la crisis como un asaltu del gran capital a lo poco que quedaba de les conquistes sociales de les décades anteriores y siñalaba la necesidá de que nun fueren les clases populares les paganes de la crisis. Les grandes centrales xugaron a amenazar a Zapatero non yá pa qu’atacara la crisis dende l’aniciu, sinón cenciellamente pa que nun reculara énte la UE, col resultáu de toos conocíu. El 15 de mayu de 2011 abríase un nuevu ciclu de movilizaciones con un nuevu componente sociolóxicu y un nuevu discursu, enfilando pel camín políticu: la constatación de que nel Reinu d’España nun hai democracia, verbalizando asina lo que munchos pensaben pero mui pocos s’atrevín a dicir, y desixendo una respuesta política a a crisis.

Dos años depués, “rescataos” adulces pola UE, los síntomes de descomposición abunden perdayures: deslexitimada la corona, deslexitimáu’l bipartidismu, el sistema políticu, les grandes centrales sindicales, la patronal, la banca, la Ilesia Católica, nun paecen quedar pegollos en pie, pero’l sistema sigue, y el sufrimientu tamién, multipicáu sigún van notándose los efectos de la mal llamada política d’austeridá.

La respuesta sigue tando per debaxo de les necesidaes pa torgar l’actual estáu de coses. Siguen les movilizaciones, pero en compartimentos estancos y faltes de perspectiva política. CCOO y UGT plantegaron la llamada “Cumbre Social”, qu’anque paecía un intentu d’entrambes centrales d’abrise a otros sectores y converxer na movilización y na alternativa, a la fin acabó siendo una pantalla más col discursu precocináu y amás erróneu dafechu: desixendo al gobiernu un referéndum vinculante (cuando tala cosa nun esiste nel ordenamientu xurídicu español) sobre l’austeridá, centrando les crítiques nel gobiernu español pero non nel asturianu y miagando por un cambiu de rumbu políticu ensin cuestionar nengún de los marcos de dominación que mos llevaron a esta situación. Les vieyes hipoteques pesen enforma. La dependencia económica del estáu, tovía más.

El sindicalismu alternativu tien un discursu más radical, fala más alto na denuncia de los responsables y pide un cambiu más fondu, pero ensin especificar. Lo mesmo pasa colos epígonos del 15M, articulaos na mesa de Confluencies. Too esto llévanos a movilizanos en llínies paraleles pero nunca converxentes. En marzu tuvimos un bon exemplu: tres manifestaciones nun mes, entamada ca una d’elles por ún de los actores mentaos: “Cumbre Social”, Confluencies, sindicalismu alternativu. No fondero, venín a escenificar lo mesmo, que nun ye otro que la voluntá d’un sector de la población de nun dexase pisar, de desixir un cambiu rial, d’amosar l’estáu d’enraxonamientu ca vez mayor.

Que tamos enfadaos yá nun lo dulda naide. Que nun queremos que siga l’actual modelu, tamién. György Lukács desplicaba poco anantes de morrer que yera lexítimo empezar con un non rotundu al estáu de coses, incluso anantes de tener una alternativa. Tenía razón, pero llega un momentu en que fai falta definir qué se quier, poner una fueya de ruta enriba la mesa. Nun ye abondo dicir que nun se pague la delda, hai qu’atrevese a cuestionar los marcos de dominación que faen posible lo que ta pasando: la unión monetaria, la propia Unión Europea, el mesmu estáu español. L’alternativa ye la rotura col sistema capitalista, y la ferramienta son los procesos constituyentes nos pueblos d’Europa, incluyendo los que conformen el Reinu d’España. Hai qu’atrevese a dicilo y, sobre too, hai qu’atrevese a facelo. Sobre cómo llegar a eso, falamos otru día.

(artículu publicáu nel nº 16 del periódicu Diagonal Asturies)

Contestar

Deberíes tar autentificáu pa poder comentar.

Actualizaciones recientes

Comentarios más recientes