Faustino Zapico

Información

Esti artículu ye del 22 Mar 2011, y ta dientro de la sección L'Arcu de Texu, Les Noticies.

Etiquetes pa esta entrada

, , , , ,

La guerra

Non a la guerraLa ONU apunta, la OTAN dispara. Cayen les bombes sobre Cirenaica. Zapatero implica al Reinu d’España nuna guerra siguiendo esactamente’l mesmu esquema qu’Aznar hai ocho años: ensin pasar pel parlamentu, del rau d’USA y desendolcando tol argumentariu sobre la maldá del dictador, qu’hasta hai bien poco yera aliáu d’occidente na llucha escontra l’integrismu. Primero Sadam, agora Qadafi. Va ocho años cientos de miles de persones salieron a la cai a protestar por una guerra indecente ¿Cuántos van facelo agora, entamando pel sindicatu de la ceya?

L’argumentu estrella del PSOE pa oponese a la guerra d’Iraq y apoyar la de Libia yera que pa la primera nun había mandatu de la ONU, y pa esta sí. La de 2003 yera asina una guerra “illegal”. ¿Hai guerres llegales? Y yá puestos, si de llegalidá se trata ¿Nun ye Qadafi l’autoridá llegal y internacionalmente reconocida de Libia? ¿Nun son los rebalbos a la so dictadura xente al marxe de la llei? ¿Ye llegal la intervención militar d’Arabia Saudí y de Qatar en Bahrein pa encontrar la satrapía petrolera? Los 42 civiles muertos nes manifestaciones de Yemen ¿Tán menos muertos que los combatientes y civiles libios?

¿Dende cuando les resoluciones de la ONU lexitimen guerres? De ser asina ¿Habrá que entamar más pa cumplir resoluciones anteriores? ¿Habrá una escontra Marruecos pa facer cumplir les resoluciones sobre’l Sah.ara? ¿Y otra escontra Turquía, miembru de la OTAN, pa facer cumplir les relatives a la invasiónde Chipre? ¿Y otra escontra Israel polos territorios ocupaos en 1967? ¿Va la OTAN, los USA, España, a encarase con esos trés países? Rescampla una vez más la enorme hipocresía que preside les rellaciones internacionales, cómo non, pero también la del PSOE. Zapatero, esta ye la to despidida, igual que la d’Aznar va ocho años, queriendo pasar a la Historia universal de la infamia mazcaráu de comandante en xefe, pero en rialidá antroxáu de monu de feria del imperiu. Güei, como ayer, non a esta guerra. Non nel mio nome.

Contestar

Deberíes tar autentificáu pa poder comentar.

Actualizaciones recientes

Comentarios más recientes