Faustino Zapico

Información

Esti artículu ye del 10 Sep 2010, y ta dientro de la sección L'Arcu de Texu.

Etiquetes pa esta entrada

, , , ,

La fuelga

Cartel convocando la fuelga xeneral del 29S de la CSILlega tarde, pero llega. Hubo milenta razones dende va dos años pa facela, pero nun se fai hasta agora. Quien la convoca ye en bona parte corresponsable de les polítiques sociales d’esti gobiernu, vendiendo paz social a cambiu d’alimentar el so comederu, pero convócala. El 29 setiembre ye la fuelga xeneral entamada por CC.OO. y UGT y secundada por munchos otros sindicatos que, nun lo escaezamos, nun son pa nada corresponsables de la que ta cayendo.

Va venti años UGT y CC.OO. entamaben fuelgues en respuesta a les polítiques neolliberales del PSOE, pero nun xugaben namás a la defensiva, porque también había contrapropuestes, otru modelu de keynesianismu avanzáu. Había, tamién, presión de les bases sindicales, sobremanera de los cuadros medios, vinculaos munchos d’ellos a les estremaes espresiones de la esquierda política. Anguaño, estos sindicatos xueguen a la defensiva, cuando la política de recortes y ataques a los derechos sociales yá ta tan avanzada que ye ca vuelta más revesosa de tornar, sobre too cuando nun se planteguen más alternatives que la reforma fiscal y cuando les bases y cuadros sindicales tán más despolitizaos que nunca.

Ye posible que facer la fuelga refuercie o lexitime a unes burocracies sindicales que dan perceguera, pero nun facela lexitima tovía más les polítiques sociales d’un gobiernu mentirosu y cobarde. Que la fuelga del día 29 seya un ésitu nun va servir tanto pa torgar lo que yá se fexo como pa torgar que se siga faciendo. Si s’abarata’l despidu, se baxen sueldos o recorten derechos y nun hai respuesta clara y dura, tamos rozando’l camín pa más recortes y agresiones. Podemos decidir: perder un día de fuelga o perder muncho más nos meses y años vinientes. La cuestión ta clara: abrir la boca o quedase a veles vinir.

Contestar

Deberíes tar autentificáu pa poder comentar.

Actualizaciones recientes

Comentarios más recientes