Faustino Zapico

Información

Esti artículu ye del 08 Jun 2010, y ta dientro de la sección L'Arcu de Texu, Les Noticies.

Etiquetes pa esta entrada

, ,

La fuelga

Fuelga de funcionarios, 8 xunu 2010Nun paez que la fuelga del día 8 entamada pola gran mayoría de les fuercies sindicales ente los funcionarios públicos tuviere un éxitu masivu nel conxuntu del estáu, pesie a la gravedá del recorte salarial. Inflúin dellos factores: d’un llau, que los propios funcionarios saben que nun tienen apoyu social pa la so protesta. Resulta hasta popular que-y baxen el sueldu a los emplegaos públicos: yá se sabe, que si nun trabayen nada, que de qué se quexen, que polo menos tienen trabayu fixu, que si tienen tantes vacaciones, que si cobren muncho… Ye igual que la tasa de temporalidá na alministración pública seya la más alta de la UE -na escuela pública asturiana, del 20%-. Ye igual que nestos diez años de medría económica los sueldos de los funcionarios medraren per debaxo l’IPC, cuando n’otros sectores los salarios xubíen bien perriba. Ye igual que’l que ye funcionariu lo seya porque aprobó unes oposiciones a les que munchos otros pudieron presentase y nun quixeron. Ye igual que’l porcentax de funcionarios seya la mitá que’l de la UE, y que neses condiciones los servicios públicos funcionen… Ye igual porque la deslexitimación social funcionó. Tovía hai un añu Fernando Lastra acusaba a los trabayadores del enseñu, en plena movilización, d’insolidarios…. por tener un trabayu fixu.

La otra razón ye la resignación. A la opinión pública, incluyendo los funcionarios, convenciósela de que nun hai perres. El gobiernu presuntamente socialista que-y regaló 9.000 millones d’euros a los bancos, que lleva tropes a invadir Afganistán pa tener por un gobiernu integrista y corruptu, que permite qu’un millonariu con una SICAV pague un 1% d’impuestos, y que n’Asturies gasta cientos de millones n’obres como’l Muselón, diznos que nun hai otra manera de sacar perres que baxando’l sueldu de los funcionarios. Y creémoslo.

Contestar

Deberíes tar autentificáu pa poder comentar.

Actualizaciones recientes

Comentarios más recientes