Faustino Zapico

Información

Esti artículu ye del 23 Mar 2012, y ta dientro de la sección Blogue.

Etiquetes pa esta entrada

, , , , , , ,

La campaña

Acaba la campaña electoral, y con ella la sobredosis de farsa permanente. Ye bien sabío que los slogan electorales intenten resumir nuna frase bien l’ideariu de quien se presenta, bien lo que propón pal país. De nun ser pola que mos ta cayendo, la verdá ye que los slogans de los partíos mayoritarios nesti país nuestru y nesta campaña electoral paecen más bien una amuesa d’hipocresía superlativa. Tenemos un PP que, después de violar sistemáticamente les promeses electorales feches en payares, como les referentes a les pensiones y a los impuestos (¿Quién podía creer que diba cumpliles?) encaró les elecciones asturianes con vaguedaes, diciendo que tán “comprometíos con Asturies” y sabiendo que, en pasando’l 25 de marzu, va facese públicu un presupuestu que va prender la mecha de la contestación social. ¿Qué compromisu pué tener col país la espresión más completa del sucursalismu? ¿Cuántu quien pon una candidata (Cherines, non esa señora de los cartelos que paez una prima segunda de Margaret Thatcher) a deu y dende Madrid?

Tenemos un PSOE que, después d’aplicar n’Asturies y en Madrid la política más nefasta imaxinable, promete xusto agora lo contrario: “seguridá, trabayu, garantía, seriedá, soluciones”. Nun hai más que velos manifestándose colos sindicatos y esprecetase escontra l’abaratamientu del despidu, que ye lo qu’ellos mesmos aprobaron hai añu y mediu. Prometen seguridá (en que nun van cumplir lo que prometen, visto lo visto), soluciones (como les que fundieron Asturies) y, ronca la maera, prometen trabayu (como los que destruyeron). Nun arranque de sinceridá, nun prometen honradez. Depués del casu Marea, los sobrecostos d’El Musel y ventipicu años de clientelismu, yera un poco escesivo.

Tenemos una IU que yá fexo escaecer que tuvo siete años nel gobiernu asturianu, compartiendo mesa y mantel col PSOE y aplicando les mesmes polítiques nefastes y qu’agora pretende presentase como daqué ayeno al poder. Por eso en precampaña dicín “Podemos con ellos”, como si ellos –IU- nun fueren tamién “ellos” –el stablishment-. Pa rematar, dícennos en campaña “Rebélate”, como si la rebelión necesaria nun los incluyera a ellos nel fatáu de coses a barrer. Nun hai más que ver les antolóxiques declaraciones de Llamazares el 20-P pasáu, cuando falaba de los “graves ataques” de Cascos a “la cultura asturiana: la TPA y el Centru Niemeyer”. IU lleva años decidiendo si quería ser parte de la solución o parte del problema: too paez indicar que yá lo fexo, y la decisión nun ye la bona.

Tenemos un FAC que mos pide “el impulso necesario”, pero tovía nun sabemos pa qué. Ocho meses tatexando pa nun facer nada, y de lo que fexo, muncho mui cuestionable. En tiempu de crisis ¿ye razonable tener l’alministración paralizada? ¿ye too culpa del bloquéu parlamentariu del PPSOE? ¿tamién la tardanza nes designaciones pa completar la cadarma alministrativa, la ignorancia de los campos que xestionaben, l’ausencia de proyectos y iniciatives? Cascos ¿impulsa o emburria? ¿Pide que lu impulsen a él? ¿Y si lu emburrien?

Pa rematar, ta quien sigún casi toles encuestes va entrar na Xunta Xeneral: UPyD, el partíu que se presenta a les elecciones autonómiques p’acabar coles autonomíes. El partíu que niega la propia esistencia d’Asturies como comunidá política, histórica y cultural, el partíu que niega la propia esistencia de la llingua asturiana, sigún esa brillante filóloga llamada Rosa Díez. El nacionalismu español, el recorte de derechos civiles y un programa socioeconómicu cagáu y pintáu del del PPSOE, asina como la negación d’Asturies ye pa estos ciudadanos “lo que nos une”. ¿Nun será lo que mos xunce?

Mala burra si pa esti domingu lo único qu’entra na Xunta Xeneral ye eso. Mala burra si mos enfotamos en qu’estes elecciones van ser les que resuelvan los problemas del nuestru país. Mala burra si nun esconsonamos.

Contestar

Deberíes tar autentificáu pa poder comentar.

Actualizaciones recientes

Comentarios más recientes