Faustino Zapico

Información

Esti artículu ye del 03 Nov 2010, y ta dientro de la sección L'Arcu de Texu.

Etiquetes pa esta entrada

, ,

Javier y Les Cuenques

Javier Fernández y Vicente Álvarez Areces, lo "nuevo" y lo "vieyo" de la mesma políticaVa dellos díis Javier Fernández, candidatu d’esi PRI asturianu que ye la FSA-PSOE, dicía que, de llegar a gobernar n’Asturies, diba llantar n’Asturies el modelu de Les Cuenques. Y dicíalo con gayola, como si fuera bona cosa, y facíalo nel campus de Mieres, monumentu absolutu a la ineptitú, al marafundiu y a la gran engañifa que foi la reconversión minera de los años 90.

¿Qué modelu ye esi que quier poner el ciudadanu Fernández en toa Asturies? ¿El d’unes cuenques que vieron perder en trenta años el 20% de la so población, con picos en valles como’l de Turón, onde la baxada ye de más del 60%? ¿El del marafundiu de los fondos mineros en paseos del colesterol, un muséu y un campus vaciu que, amás, sigue medrando n’edificios y en gastu? ¿El d’una autovía minera llena d’argayos y ensin enllaces? ¿El de la voladura de la minería ensin alternatives xeneradores de riqueza, más p’allá de les empreses cazasubvenciones entamaes polos amigos políticos que duren tanto como la propia ayuda pública? ¿El de la tasa d’actividá más baxa d’Asturies, que ye la más baxa de la UE? ¿El de les llinies d’alta tensión y centrales térmiques como Lada o La Perea?

El ciudadanu Fernández diznos qu’hai que cambiar el modelu productivu. ¿Qué modelu, si nes cuenques nunca llegó depués de que volaren l’otru, que tenía tolos males que se quieran, pero polo menos xeneraba empléu? Esta gran anuncia facíala al llau del Pozu Barreo de Mieres, escenariu de les dures movilizaciones de 1991-92, al que ponía como exemplu de “lo vieyo” en contraste colo “nuevo”, que ye’l Campus. Va venti años, Barreo xeneraba 1000 empleos directos y 4000 indirectos. ¿Cuántos xenera agora’l campus? ¿50? Pues eso. Prepárate Asturies, llega Javier Fernández.

Contestar

Deberíes tar autentificáu pa poder comentar.

Actualizaciones recientes

Comentarios más recientes