Faustino Zapico

Información

Esti artículu ye del 26 Dec 2010, y ta dientro de la sección L'Arcu de Texu, Les Noticies.

Etiquetes pa esta entrada

, , ,

Fuelga Xeneral

Trancao por fuelga xeneral¿A qué esperen? El gobiernu del PSOE ta solu pidiendo la xuba de la edá de xubilación de 65 a 67 años (ver pa creer). Acaben d’anunciar más privatizaciones, ente elles, la d’AENA. Van xubir el cómputu d’años trabayaos pa cobrar la pensión íntegra de quince a venti, y eso supón baxar la pensión media ente un 15 y un 20%. Siguen les agresiones sociales, proporcionalmente mayores sigún se va viendo que nun hai respuesta.

La fuelga xeneral del 29 setiembre fo un ésitu mayor de lo que les propies CC.OO. y UGT esperaben y merecíen. Amosó que, con tolos errores y la política de subordinación al réxime que lleven dende hai diez años, tovía tienen una representatividá y una relativa lexitimidá como interlocutores de la clase trabayadora. La fuelga de setiembre foi, posiblemente, una de les últimes amueses d’apoyu a unes organizaciones que ca vuelta faen más por nun lu merecer. Esa victoria política quedó pa prau nel momentu en que’l gobiernu dixo que nun diba mover una coma de la reforma llaboral. Podía ser esperable. Lo que nun lo ye que les organizaciones sindicales nun tarden nin una selmana en convocar otra. Como en Francia, como en Grecia, como en Portugal. Por contra, saquen a la xente de procesión nesti mes d’avientu, mientres pierden lexitimidá y refuercien el discursu del PP que, oh milagru, preséntase agora como’l “partíu de les clases trabayadores”, sigún Cospedal.

En política nun hai espacios vacios. Tolos güecos que dexen unos acaben rellenándolos otros, anque seya dende la impostura. El problema nun ye solo qu’al gobiernu central del PSOE vaiga sucedelu unu del PP, cosa polo demás inevitable viendo l’actual correllación de fuercies, sinón qu’esi gobiernu va topase col camín rozáu d’equí a venti años, col movimientu sindical deslexitimáu, la esquierda desfecha y con la contrarreforma a medio facer. Namás van tener que rematala. Por pura supervivencia, anque seya de les propies burocracies sindicales, que llamen a la fuelga yá.

Contestar

Deberíes tar autentificáu pa poder comentar.

Actualizaciones recientes

Comentarios más recientes