Faustino Zapico

Información

Esti artículu ye del 03 Nov 2009, y ta dientro de la sección L'Arcu de Texu, Les Noticies.

Etiquetes pa esta entrada

, , , ,

Fraude electoral

Parllamentu VascuÚn de los trazos definitorios del sistema políticu de la Restauración, períodu históricu español que va de 1875 a 1923, yera’l turnu ente dos grandes partíos, lliberales y conservadores, entrambos partidarios de la Constitución de 1876 y de la monarquía borbónica, que se ponín d’alcuerdu p’arrequexar a les demás fuercies polítiques al traviés de la prohibición, la manipulación del votu y el fraude electoral. Anque toos dos yeren formalmente rivales, siempre actuaben xuntos a la de torgar a terceres fuercies ocupar espacios de poder, yá fueren carlistes, esquierdes varies o nacionalismos periféricos.

Ye inevitable, vistos los acontecimientos de les postreres selmanes, pensar en qu’esta II restauración paezse hasta plasmar a la I. Hubo unes elecciones en Vasconia a les que nun se pudo presentar Batasuna o les sos marques, baxo l’argumentu de les “llistes contaminaes” (¿Nun tán les llistes del PSE-PSOE y el PP llenes de xente qu’apoyó y xustificó’l terrorismu d’estáu, tanto del GAL como del franquismu?). De poder presentase, los nacionalistes vascos tendrín cómoda mayoría na cámara vasca. En tou casu, incluso cola proscripción de Batasuna, los votos del nacionalismu vascu y los de la federalista EB son mayoría (PNV+Aralar+EA+EB=51’8%) sobre los del nacionalismu español (PSE+PP+UPyD=46’9%) pero gracies a una llei electoral inxusta (de la que ye culpable en bona parte el propiu PNV) onde’l votu alavés val el triple que’l vizcainu, los que son minoría social y electoral tienen 39 de los 76 escaños. Pa rematar, los partíos turnistes, los lliberales y conservadores del sieglu XXI, pónense d’alcuerdu y formen gobiernu. Que nestes condiciones Iñigo Urkullu fale de güelpe institucional tien xacíu. Que Patxi López fale de superar el frentismu ye, cenciellamente, hipocresía. Del Frente Nacional Vascu al Frente Nacional Español, esi ye’l cambiu en Vasconia. A ver lo que dura.

Contestar

Deberíes tar autentificáu pa poder comentar.

Actualizaciones recientes

Comentarios más recientes