Faustino Zapico

Información

Esti artículu ye del 24 Jan 2012, y ta dientro de la sección L'Arcu de Texu, Les Noticies.

Etiquetes pa esta entrada

, , , , , , , , ,

Fraga

Morrió Manuel Fraga, pero la Segunda Restauración permanez. Imitando al so almiráu Cánovas del Castillo, perpetrador de la dictadura perfeuta mazcarada de democracia, foi ún de los redactores de la Constitución del 78 qu’afitó’l réxime postfranquista que lo cambió too pa que too quedara igual. Modelu de gattopardismo, muerre en golor –o fedor- de santidá.

Sepulcru esblanquiñáu, como bon fariséu que siempre foi, supo reinventase y pasar de faxista confesu a lliberal conservador –y demócrata, of course- de tola vida, conservando intacta l’almiración de bona parte de la ultraderecha franquista a la qu’en rialidá siempre despreció. Ministru d’Información y Turismu, esto ye, de Propaganda, féxose famosu por bañase en Palomares pa cortar los rumores de contaminación radiactivo del agua, pero nesi puestu tuvo tamién ocasión de facer otres actividaes menos ridícules y muncho más tráxiques, como participar nel conseyu de ministros que confirmó la sentencia de muerte de Julián Grimau, crime d’estáu escenificáu en 1963, o la campaña de llevantos a los mineros asturianos y les sos families nes fuelgues d’esi mesmu añu.

Otra vuelta ministru nel primer gobiernu de la monarquía, agora d’Interior, cargu mui afayáu a la so personalidá mandona, foi el responsable cimeru de les matances de fuelguistes en Vitoria y de carlistes en Montejurra, toes elles en 1976, auténtiques espresiones de terrorismu d’estáu que, cómo non, quedaron impunes. Depués de fundar Alianza Popular, foi consciente de que tenía un techu de cristal que-y torgaba, a él y la derecha confesa, volver al gobiernu. Hubo sucesión, cómo non, con dedazu. Primero, la mancha de Mancha. Depués, Aznar. Un retiru doráu de cacique en Galicia y, agora, la muerte arrodiáu d’afalagos. Lo único destacable y emponderable de la so trayectoria ye la so inmensa capacidá intelectual, que rescampla tovía más si la comparamos cola mediocridá de los que lu sucedieron n’entrambos llaos del abanicu políticu.

Contestar

Deberíes tar autentificáu pa poder comentar.

Actualizaciones recientes

Comentarios más recientes