Faustino Zapico

Información

Esti artículu ye del 22 Apr 2009, y ta dientro de la sección L'Arcu de Texu, Les Noticies.

Etiquetes pa esta entrada

, , , , ,

Fiebre verde

Tren d'Alta VelocidáMuncho duraba la fiebre verde de la FSA, que tuvo como primer y únicu síntoma la oposición al AVE del Cantábricu cola sida de la estroza ambiental que xeneraba. El partíu del Muselón y la regasificadora, que quier llenar Asturies de centrales térmiques, banzaos y llínies d’alta tensión, oponíase paradóxicamente pero con razón a una obra que xenera una cicatriz de 50 metros d’ancho nuna zona d’evidente riqueza natural, atravesando –más bien achaplando- conceyos tan pequenos como Caravia.

Pero yá sabemos, la FSA y el PP lleven años aprendiéndonoslo, qu’onde manda patrón nun manda marineru. Los que nun abren la boca pola comedia del portalgu del Güerna o polos retrasos del tramu Unquera-Llanes, dicen agora per boca de Javier Fernández qu’en rialidá ellos nun ye que tuvieren a la escontra, qué va, lo que pasa ye que quieren otru trazáu. Quien pensara que na FSA tovía quedaba un migayín de dignidá yá pue dir cayendo na cuenta de lo que ye un estáu centralista sosteníu por partíos sucursalistes: Yo, l’Estáu, el gobiernu de la sacrosanta nación española, doi, quito, pongo, diseño, retraso o abandono. Tu, gobiernu “autónomu” o delegación del partíu turnista correspondiente, dices amén y aplaudes.

Ye evidente, l’AVE fadráse o non, tendrá retrasu o non, fadrá muncha o poca estroza ambiental, pero eso nun va depender pa nada de lo que faga o diga’l gobiernu asturianu de la “esquierda plural”, sinón del ministeriu de Fomentu y la capacidá de presión de los gobiernos vascu y, en menor midida, gallegu. La fiebre cúrase con reposu y caldinos, la fiebre verde de la FSA con un tirón d’oreyes, pero la enfermedá d’Asturies necesita un bon diagnósticu y muncha ciruxía. Doctor House, Asturies necesítate.

Contestar

Deberíes tar autentificáu pa poder comentar.

Actualizaciones recientes

Comentarios más recientes