Faustino Zapico

Faustino Zapico

Faustino Zapico, Secretariu Xeneral d'Izquierda Asturiana (IAS)Nací en Mieres del Camín el 5 d’Avientu de 1970 y resido anguaño en Los Nadales, L’Agüeria San Xuan, conceyu de Mieres. Soi llicenciáu n’Historia y Xeografía pola Universidá d’Uviéu. Dende 1996 exerzo como profesor de secundaria, actividá que me llevó unos años fuera d’Asturies y soi afiliáu del sindicatu d’enseñu SUATEA. Dende mozu milité en delles organizaciones sociales y polítiques: formé parte del Conceyu d’Estudiantes Nacionalistes (CEN); del Comité de Solidaridá con América Llatina (COSAL); de la Xunta pola Defensa de la Llingua y milité nel partíu Unidá Nacionalista Asturiana (UNA). En 1992 fui ún de los fundadores d’Izquierda Asturiana (IAS) de la que fui portavoz y actual secretariu xeneral.

Tengo fecho investigaciones en dellos campos históricos, pero destaquen ente elles el so llabor sobre les corrientes politiques na Asturies contemporánea. Nesi marcu entamé los trabayos pa la so tesis doctoral sobre federalismu y autonomismu, anguaño bloqueada y nun almitida na Universidá d’Uviéu por tar presentada en llingua asturiana. Nesi mesmu sen, publico en 2007 el llibru “1808 o l’aniciu de la historia contemporánea d’Asturies”.

Soi autor también d’otros trabayos menores espardíos en delles publicaciones y d’un percompletu estudiu sobre Sudáfrica que vio la lluz baxo’l títulu “Historia de Sudáfrica: El nacimientu d’una nación”.

Anguaño soi’l Secretariu Xeneral d’IAS.

Pa ponete en contactu conmigo pués facelo en faustinozapico [@] hotmail.com, na mio cuenta en Twitter o nel mio perfil en Facebook.