Europeos doloris causa

Somos europeos. Yéremoslo yá anantes de que mos lo dixera la CEE, que repartía los carnés. Fuímoslo tovía más cuando entamaron les reconversiones de los sectores productivos asturianos: el carbón, l’aceru, la lleche, la piesca… Notábase lo europeos que yéremos porque sufríemos más que naide les consecuencies del ingresu del Reinu d’España nel club de los diez. Nun yéremos europeos honoris causa, sinón doloris causa. Y neso siguimos.

Caro que pa combatir el dolor llegó l’anestesia. Fondos Mineros, de Cohesión, prexubilaciones, yeren los calmantes qu’adormecín esi cuerpu llamáu Asturies mentanto se-y diben amputando brazos y pates. El problema ta en que’l ciruxanu, en cuenta de sustituyir esos brazos y pates por otros biónicos, gastó les perres pa compralos y, como si nun se diera cuenta naide, punxo nesi cuerpu adormecíu torres d’alta tensión, un superpuertu y un ciclu combináu. Y al paciente empiecen a pasáse-y los efectos de l’anestesia y va esconsonando, y ve que nun tien esos brazos y pates biónicos tan guapos, sinón esos otros toroyos tan feos, y el ciruxanu diciéndo-y que vaya bien que salió too, que mira tu cuánto va poder blincar agora.

Y de sópitu un airón tremendu abre les ventanes y entra na habitación. “Ye l’aire de la crisis”, dicen. Y el paciente garra una neumonía. Y el ciruxanu diz que nun hai perres nel hospital pa más medicación, y siguen los dolores y esos muñones tan feos por brazos y pates.

Igual-y pasó a más pacientes, pero’l casu que conocemos ye esti. Pa qu’esi paciente sane hai que cambiar l’hospital enteru, y echar al ciruxanu, al anestesista y a tol equipu médicu. El 7 de xunu tien de sentise la primer voz desixendo’l despidu. Depués del 7, milenta más.