Faustino Zapico

Información

Esti artículu ye del 07 Jul 2011, y ta dientro de la sección L'Arcu de Texu, Les Noticies.

Etiquetes pa esta entrada

, , ,

Estremadura

Muncho tuvieron qu’aguantar -y lo que-yos queda- los militantes de la IU estremeña por decidir democráticamente abstenese nes votaciones parlamentaries a la presidencia d’esa comunidá, lo que permite al PP -que ganó les elecciones- facese col gobiernu pero ensin cuntar cola mayoría na cámara.

Repítese la hestoria de siempre. El PSOE afitó n’Estremadura, como en Castiella-La Mancha, Andalucía o Asturies, un réxime de cuasi trenta años basáu en mayoríes electorales, eso sí, convenientemente alimentaes pola rede clientelar. IU saca la cabeza y, cuando’l PSOE pierde la mayoría absoluta, pasen dos coses: o bien pauta, entrando en gobiernos de coalición que reediten ensin alpenes cambeos les polítiques del PSOE y siendo asina copartícipes de les mesmes, colo que’l votu a IU pasa a ser daqué inútil porque vese como’l cayáu del hermanu mayor de la presunta esquierda (casu Asturies en 2003 y 2007), o bien nun pauta, pero nun soporta la presión mediática y les engarraes internes, baxa nes siguientes elecciones y entós, presa de la mala conciencia, fai propósitu d’enmienda y vuelve a asumir la so condición de subordinada al PSOE. Como n’Asturies en 1995.

Porque esa ye la cuestión, si IU quier ser una esquierda alternativa o subalterna. Si el PSOE y el PP comparten el mesmu modelu constitucional, la mesma política económica y la mesma política esterior ¿Cuála ye la razón metafísica pola qu’IU tien de poner al serviciu del PSOE los votos que-y falten pa formar mayoría parlamentaria y nun dexar gobernar al PP cuando gana? Si la propia IU denuncia la verdadera pinza, la del PSOE-PP escontra la ciudadanía, que n’Asturies tien amás la so másima espresión nel pautu del duernu, pero depués ella mesma se desmiente encontando al PSOE cuando fai falta, ta cayendo na contradicción absoluta: nun se pué dicir una cosa y la contraria y depués dir de coherente. IU d’Asturies yá elixió cuantayá ser l’hermanu menor. IU Estremadura non. Felicidaes.

[Les Noticies 01/07/2011]

Contestar

Deberíes tar autentificáu pa poder comentar.

Actualizaciones recientes

Comentarios más recientes