Faustino Zapico

Información

Esti artículu ye del 19 Apr 2012, y ta dientro de la sección Blogue, L'Arcu de Texu.

Etiquetes pa esta entrada

, , , , , ,

El rei ta desnudu

L’accidente del monarca nuna cacería d’elefantes en Botswana fexo que la opinión pública conoza a qué se dedica’l ciudadanu Borbón nel so tiempu llibre –lo de “tiempu llibre” ye un dicir-. L’accidente del ñetu del rei pegándose un tiru en pie, con trece años, fexo que la opinión pública sepa que la familia rial piensa que la llei, incluyendo la del usu d’armes, nun ye cosa qu’ellos deban cumplir. L’escándalu entamáu poles actividaes d’Iñaki Urdangarín, y l’intolerable tratu de favor que ta teniendo Cristina de Borbón, fexo que la opinión pública sepa que la igualdá énte la llei ye imposible nun estáu qu’asume’l principiu monárquicu, que parte de la idea de la desigualdá ente les persones dende’l momentu en qu’una d’elles pué heredar un país enteru como quien hereda un prau del güelu.

Que la fortuna del ciudadanu Juan Carlos ye de les mayores d’Europa empieza a sabese al sur de los Pirineos, pesie al silenciu mediáticu. Que Juan Carlos ye ún de los responsables cimeros de la entrega del Sah.ara Occidental, una provincia española daquella al mesmu nivel que Soria, Asturies o Barcelona, a Marruecos, col posterior xenocidiu que dura yá trenta y siete años, yá se comenta abiertamente por dellos autores. Qu’esi mesmu ciudadanu tuvo una participación el 23-F mui estremada de lo que la edulcorada versión oficial mos diz empieza a ser un secretu a voces. Incluso que’l propiu monarca, por estupidez absoluta o por maldá ensin fin ye’l responsable directu de la muerte del so hermanu menor Alfonso de Borbón cuando yera mozu nadie s’atreve yá a negalo.

Va años yera impensable ver a dellos medios de comunicación de mases facer unes crítiques tan abiertes a la figura del rei y a la institución qu’encarna, como yera impensable tamién ver a representantes del turnismu políticu falando d’abdicación, como ye’l casu de Tomás Gómez, cabezaleru del PSOE madrilanu. En tiempu de crisis una institución radicalmente discriminatoria, gastiza y arcaica rescampla tovía más na so inutilidá, y amás cuando tola familia rial paez ponese d’alcuerdu n’amosanos lo incompetentes, inútiles y corruptos que son. La popularidá de Juan Carlos I, garante de la unidá d’España, ye güei más baxa que nunca nun momentu de recesión económica ensin fin y con una mayoría social soberanista en Cataluña y Vasconia. El traxe del emperador empieza a vese como lo que siempre foi, la nada, una ilusión, una gran mentira. El rei ta desnudu, y nin siquiera lo ta porque lu desnudaren los republicanos, sinón pola so propia incompetencia. Va ser verdá eso de qu’igual llegamos a la República por selección natural.

Contestar

Deberíes tar autentificáu pa poder comentar.

Actualizaciones recientes

Comentarios más recientes