Faustino Zapico

Información

Esti artículu ye del 13 Jan 2012, y ta dientro de la sección Blogue.

Etiquetes pa esta entrada

, , , , ,

El bonu, el bastu y la fata

Tamos asistiendo estos díis a una ceremonia de lo más indecente nel ámbitu cultural, onde s’axunta la ignorancia y el caciquismu col cosmopaletismu pseudoprogre más maurientu pa dar como resultáu un espectáculu de vergoña.

La destitución de José Luís Cienfuegos, el bonu, de la dirección del Festival Internacional de Cine de Xixón provoca, cuando menos, plasmu. Nun ye razonable prescindir de quien amosó una eficacia y un saber facer mui poco corrientes nesta Asturies nuestra tan llena de xestores culturales que son simples marionetes de quien los punxo, completos incapaces o toes dos coses a un tiempu. Los resultaos del FICX nestos dieciséis años, tanto en xuba d’espectadores como en prestixu son d’una evidencia tala que nun fai falta que los sulliñemos. ¿Por qué, entós, la destitución?

D’otru llau, la oposición oficial, formada por quien convirtió Asturies nun ermu a tolos niveles, aprovecha, encetaos como tán pola so concepción cosmopaleta de lo que ye la cultura, pa cargar escontra tolo que güela a cultura asturiana y, de pasu, meter nel mesmu sacu a la más que xustificada ofensiva escontra l’aprovechamientu indecente que’l PSOE quería facer del Centru Niemeyer, o a la intervención nel Muséu Etnográficu de Grandas, faciendo escaecer qu’esa situación fuera provocada pol anterior gobiernu asturianu. ¿Qué tien que ver el despropósitu d’Avilés, auténticu comederu, col FICX? Del papel de la prensa, tanto La Voz de Asturias como La Nueva España, nin falamos.

El gobiernu local de Xixón acaba de da-y carnaza, y amás de forma injustificada, a una oposición faltosa que presenta lo asturiano como contradictorio cola modernidá, cola impagable collaboración d’un conceyal de Cultura, el bastu, pol que tovía tamos esperando pa conocer los sos ambiciosos planes de normalización del asturianu. Les declaraciones de Carmen Veiga, la fata, diciendo qu’esti gobiernu diba llevantar l’asfaltu pa dexar prau y pa qu’andemos en medreñes definen, sobre too, lo que ye la propia Carmen Veiga, lo que ye la visión del mundu que tién el PSOE y la esquierda subsidiaria. Asturies merez otra cosa.

Un comentariu

  1. [...] hestoria y llingua. Eso sí, tamién hai que dicir qu’afortunadamente, artículos como los de Faustino Zapico o Pablo Rodríguez Alonso dexaben mui a les clares cuálu yera’l puntu de vista necesariu [...]

Contestar

Deberíes tar autentificáu pa poder comentar.

Actualizaciones recientes

Comentarios más recientes