Faustino Zapico

Información

Esti artículu ye del 12 May 2011, y ta dientro de la sección Blogue.

Etiquetes pa esta entrada

, , , , , ,

El 15 de mayu, a esconsonar

15 mayu 2011 Toma la caiVa dolce-quince años falábase de la mio xeneración, la del Baby-boom, la de los nacíos ente los caberos sesenta y los primeros setenta, como d’una xeneración yá condergada a vivir pior que los sos padres. La más numberosa de la Historia d’Asturies y la más formada, empobinada hacia la precariedá llaboral y/o la emigración. En gran midida fo asina, y asina podemos comprobalo na gran masa de mileuristes de más de trenta y cinco años que pueblen el mercáu llaboral. En tou casu, somos una xeneración que vive pior que los nuestros padres pero namás anguaño, más que nada porque ellos son o yeren fíos de la posguerra, y les sos condiciones fueron abondo piores que les nuestres cuando tenín la nuestra edá.

Sicasí, esta profecía sobre la fin del estáu social ta pa cumplise cola nueva xeneración, la de los mozos qu’anden agora pela ventena. Son menos, igual o más de preparaos que nós, fíos d’una xeneración que sí-y tocó dafechu la bonanza económica del Reinu d’España y qu’agora vense con un futuru diseñáu pa ellos basáu na eterna precariedá llaboral, la emigración y la negación d’unos niveles de consumu y de prestaciones sociales que sí esfrutaron los sos padres. Y pagando. Condergaos a pagar la Universidá, y nel futuru pola Sanidá, por un plan de pensiones priváu, pola escuela de los sos fíos –si lleguen a tenelos-, o por un pisu qu’igual van siguir pagando depués de perdelu. Ensin derechos llaborales, ca vuelta más recortaos pola presunta socialdemocracia y la complicidá de les centrales sindicales mayoritaries, que caven asina la so propia tumba y, de pasu, la de la clase obrera entera. Nel casu de Les Cuenques ye más evidente tovía: padre prexubiláu, fíu paráu o sobresplotáu.

Esa situación ye común a la de tol Occidente européu: en Portugal llámenla Geração à Rasca, o xeneración en precario, quinientoseurista, hipotecada, burllada. Hai delles selmanes una manifestación inmensa en Lisboa marcó l’aniciu de les protestes d’esta xeneración que quier ser ama del so futuru, que quier autodeterminase, y agora esti movimientu llega al Reinu d’España, entamando manifestaciones pal 15 de mayu. N’Asturies, ye a les 18:00 hores na Estación de Renfe d’Uviéu.

Ye’l momentu d’esconsonar. Siguiendo’l camín que marca la mocedá portuguesa y les movilizaciones sociales de Francia, Irlanda, Italia o, especialmente, Islandia, onde asistimos a una auténtica revolución ciudadana que ta refundando democráticamente la república, negándose al diktat del UE y el FMI. Franciendo ideolóxicamente con esa vieya esquierda heriede del mitu del “progresu” –como tovía mos recuerda la campaña de la FSA-PSOE- y apostando pol repartu perriba del crecimientu. Apostando pola democracia radical, republicana, que ve nel autogobiernu de los pueblos daqué más que meter un cachu papel nuna urna ca cuatro años.

Tamos nuna campaña electoral onde paez que tamos condergaos a escoyer ente la puxarra o la gandaya, onde ye igual quién salga porque paez que tien les manes ataes polos “mercaos”, como si éstos nun fueren élites empresariales concretes que quieren midides concretes p’arriquecese más y recortar derechos a la ciudadanía. Como si fuera imposible negase a obedecer. Como si fuera imposible cambiar les coses, cuando n’otros países yá tán cambiando.

Cuando pensábemos que la nuestra sociedá civil tenía mui pocu pulsu, topamos con una mocedá que nun se conforma col futuru tan prietu que quieren fabrica-y. Paga la pena intentalo, más que nada, porque pior nun va ser. El futuru yá llegó, y nun presta nada.

6 comentarios

  1. [...] El 15 de Mayo, a despertar (AST) faustinozapico.com/blogue/el-15-de-mayu-a-esconsonar/  por Espiñeta hace 2 segundos [...]

  2. [...] El 15 de Mayo, a despertar (AST)     [...]

  3. [...] El 15 de Mayo, a despertar (AST)     [...]

  4. [...] » noticia original Esta entrada fue publicada en General. Guarda el enlace permanente. ← Agujero en la vasija del reactor 1 en Fukushima El plan nazi para la destrucción de Nueva York → [...]

  5. [...] » noticia original [...]

  6. [...] » noticia original [...]

Contestar

Deberíes tar autentificáu pa poder comentar.

Actualizaciones recientes

Comentarios más recientes