Faustino Zapico

Información

Esti artículu ye del 27 Apr 2012, y ta dientro de la sección Blogue, L'Arcu de Texu.

Etiquetes pa esta entrada

, , , , , , , ,

Educación pa la… ¿Ciudadanía?

Esti cursu 2011-12 va pasar a la Historia educativa, ente otres munches coses, pola anunciada desapaición de l’asignatura “Educación pa la Ciudadanía”. Curtia vida pa esta materia, aprobada en 2006, que va ser sustituyida por otra llamada “Educación Cívica y Constitucional”. Acaba asina, de momentu, l’espolín qu’esta materia xeneró, yá que’l PP y la Ilesia Católica llevaben seis años bramando escontra ella, xenerando asina una de les polémiques más falses y ridícules de la Historia educativa d’esti país.

¿Ú la polémica sobre la Educación pa la Ciudadanía? El PP y la Ilesia dixeron que con esta asignatura l’Estáu asumía la educación moral de les persones, que yera un adoctrinamientu intolerable y qu’atentaba escontra la llibertá de pensamientu, que-y quitaba a les families el derechu d’educar en valores a los fíos y que eso abría les puertes a un estáu totalitariu.

¿Por qué la polémica yera falsa? Básicamente porque nun se daba nella nengún conteníu que nun se diera primero n’otres asignatures yá fuera al traviés de los famosos “temes tresversales” que consagrara la LOGSE y les sos lleis sucesores, aprobaes la primera col PSOE en gobiernu y la siguiente col PP, o dientro del currículu d’otres asignatures. Y ye qu’en rialidá Educación pa la Ciudadanía yera un mecigayu de namás una hora selmanal que consistía n’axuntar los dos caberos temes del currículu de Ciencies Sociales de 3º de la ESO, los de la desigualdá Norte-Sur, esos que nunca da tiempu a dalos, otros dos o trés de la Ética de 4º, los relativos a los derechos humanos, les rellaciones interpersonales y los diferentes modelos afectivos y de familia, y un tema de les Ciencies Sociales de 4º, el de la Santa Transición: esa fábula que vien a dicir daqué asemeyao a que “Va munchos años n’España había un señor mui mayor que mandaba muncho y nun había democracia, y cuando morrió apaeció un rei mozu y guapu, que nadie sabe d’onde vieno, y que trexo una Constitución y la democracia debaxo’l brazu y d’entós p’acá fuimos felices y envidiaos nel mundu enteru”.

¿Ye eso adoctrinamientu? Sí, yelo, pero yéralo tamién cuando esos conteníos, en cuenta de dase n’Educación pa la Ciudadanía, facínse en Ciencies Sociales. ¿Quién s’escandaliza agora “descubriendo” que la escuela adoctrina? ¿Nun lo fexo siempre? ¿Ú la frontera ente la llibertá de cátedra y l’adoctrinamientu? Caro qu’esiste, la cuestión ye saber ónde ta. Obligar al profesoráu a cantar les escelencies del actual marcu constitucional ¿Nun ye violentar la llibertá de cátedra de los trabayadores de la enseñanza? Agora bien, la escandalera qu’entamó la ilesia y el PP nun foi por obliganos a emponderar al réxime, sinón porque na asignatura, resumiendo muncho, vien a dicise que gais y lesbianes son persones. Pero ye qu’eso yá se facía anantes n’Ética de 4º de la ESO. ¿Qué pasó entós, que los gobernantes del PP nun conocín los currículos educativos nin siquiera cuando ellos gobernaben? ¿A qué vieno facese cruces entós?

La gran impostura vieno entós cuando’l PP asumió’l papel de derecha católico-papista y el PSOE el de radicales anticristianos. Yera l’añu 2006, tovía nun llegara la crisis y daquella, tovía más qu’agora, había que mirar con lupa pa estremar la política económica d’unos y otros, porque yera la mesma. Ximielgar la bandera de la polémica ideolóxica per parte y parte sirvió-yos a toos dos, PSOE y PP, pa paecer menos asemeyaos de lo que yeren.

Agora manda’l PP, y el ministru Wert, esi home tan llistu que sabe tanto d’educación, diz que Educación pa la Ciudadanía va ser sustituyida por una nueva asignatura llamada Educación Cívica y Constitucional, que tará “llibre de cuestiones controvertíes” (esto ye, lo de los modelos de familia y lo de que los gais son persones), polo que va ser únicamente… lo que yá yera: adoctrinamientu nos valores de la Constitución de 1978, qu’hai que comencer a los nenos de que vivimos nel meyor de los mundos posibles y que la única democracia qu’hai ye esta II Restauración que tenemos. Y pa rematar la xugada y amosar bien la so ignorancia, bien la so mala fe, punxo como exemplu de lo mala que yera y de lo muncho qu’adoctrinaba l’actual Educación pa la Ciudadanía un manual supuestamente de la mesma, l’ensayu de Carlos Fernández Liria, qu’en rialidá yera un ensayu… escontra l’asignatura.

De Formación del Espíritu Nacional a Formación del Espíritu Constitucional. La escuela adoctrinó siempre, y sabémoslo, pero que nun mos traten como si fuéremos fatos.

Faustino Zapico
Profesor, ente otres cinco materies, d’Educación pa la Ciudadanía
Boletín nu. 164 de SUATEA

Contestar

Deberíes tar autentificáu pa poder comentar.

Actualizaciones recientes

Comentarios más recientes