Faustino Zapico

Información

Esti artículu ye del 12 May 2014, y ta dientro de la sección Blogue, L'Arcu de Texu.

Etiquetes pa esta entrada

, , , , , ,

Discursu del 1 de mayu

Manifestación del 1u. de mayuEsti añu tocóme representar al mio sindicatu, SUATEA, nes intervenciones que remataron la manifestación que fiximos en Xixón la CGT, CSI y SUATEA. Lo que vien agora ye la trescripción literal del discursu que di:

Compañeros y compañeres:

Munches gracies, munches gracies pola vuestra presencia equí en nome de SUATEA, Sindicatu Unitariu y Autónomu de Trabayadores de la Enseñanza d’Asturies, porque los trabayadores de la enseñanza tamién somos clase obrera. Frente a esos que creen, que dicen que son, y creen que son clase media, equí decímoslo bien claro, los asalariaos de la enseñanza y de cualquier otru sector, somos clase obrera, somos miembros miembros orgullosos de la clase obrera y tamos equí pa celebrar la nuestra identidá colectiva como clase obrera.

Un añu más, venimos a reivindicar lo que ye nuestro, lo que mos tan quitando dende va años cola falsa sida de la crisis: salú, trabayu, techu. Venimos sufriendo agresiones, esti añu otres cuantes más. Tenemos equí una bona prueba d’ello. Lluches exemplares, como les de los trabayadores de Liberbank, Monroe o l’Hotel León. Y sigue, siguen los EREs, pero los EREs nun son solo los que faen les empreses privaes, los EREs son tamién los que se faen na alministración pública, los EREs tamién los fai esti gobiernu de la supuesta izquierda. Los recortes vienen de Madrid y aplíquense n’Uviéu. Y esos EREs silenciosos qu’hai na alministración pública tamién los hai n’Educación: 1.400 puestos de trabayu menos en cuatro años, y precarización ca vez mayor del colectivu: baxaes salariales, medies xornaes… Y eso fáilo un gobiernu del PSOE, un gobiernu de la “izquierda”. Y depués dícennos que nun son lo mesmo.

Esti añu, los trabayadores de la enseñanza y el conxuntu de la comunidá educativa y de la ciudadanía entera tuvimos ente otres munches lluches la llucha de la LOMCE, la contrarreforma educativa qu’aplicó’l gobiernu del PP. Y tenemos un gobiernu que diz que ta en contra de la LOMCE. Ta en contra de la LOMCE grandona, dicen ellos, pero apliquen equí la LOMCE piquiñina, precarizando permanentemente.

¿Qué ye la LOMCE? ¿Qué ye la contrarreforma educativa? A curtiu plazu como siempre, facer caxa, privatizar, dar perres a los amiguinos, xeneralizar los conciertos educativos, pero a mediu plazu de lo que se trata ye de disciplinar a la clase obrera, de crear esa clase obrera del escenariu postcrisis. Agora que mos tán diciendo que tamos saliendo de la crisis, qu’en realidá nun ye otro que metenos yá nel ciclu de l’austeridá perpetua, de lo que se trata ye de crear esa clase obrera del futuru, esa clase obrera con una educación deficiente, qu’acepte… una educación de mierda, pa xenerar mozos qu’acepten xornales de mierda, por trabayos de mierda, pa llevar una vida de mierda. Esi ye’l futuru que mos ta dexando tanto’l PSOE como’l PP. Esi ye’l futuru que tán diseñando cola contrarreforma educativa. Porque esti ye l’oxetivu, esto nun ye una crisis, ye una estafa, de lo que se trata ye de disciplinar a la clase obrera, y pa eso hai qu’empezar dende’l principiu, dende la escuela.

Tenemos que romper les cadenes. Tenemos munches cadenes. Posiblemente la prioritaria agora mesmo seya esa delda esterna que mos metieron. Esa delda que nun podemos pagar y que nun debemos pagar porque nun ye nuestra.

Sin embargo, vienen agora les elecciones europees. Y dícennos qu’hai que votar nes elecciones europees pa facer una Europa más social. ¿Qué ye una Europa más social? Pidir una Unión Europea más social ye como pidi-y a una anaconda que se faga vexetariana. Ye imposible, ye antinatural, nun pue ser. La UE ye esa anaconda que mos ta afogando dende va años, que mos ta devorando. Por muncho que pretendan antroxala de colorao, sigue siendo una anaconda, sigue siendo l’enemigu. Por eso hai que salir del euro, por eso hai que romper les cadenes, y por eso hai qu’atrevese a dicilo bien alto.

Venimos de meses de movilizaciones, de movilizaciones mui dures, y de movilizaciones grandes. Vímoslo equí va mes y mediu cola movilización de los trabayadores en llucha, y vímoslo tres díis depués en Madrid, coles Marches de la Dignidá, con más d’un millón de persones diciendo que nun se pue pagar la delda, porque nun ye nuestra, y nun vamos pagala.

Y esti ye’l camín, compañeros y compañeres. el de la unidá, anque seya revesosa munches veces. Pero ye necesario porque esta unidá ye’l resultáu d’eses movilizaciones qu’empezaron yá nos años noventa, contra l’ecofin, el 15M, les marees ciudadanes, esa ye la unidá necesaria, y la unidá posible, pa ser a quien a baltar a esos gobiernos corruptos, porque nun ye solo cuestión de cambiar el gobiernu, tenemos que cambiar el réxime, y esti sistema indecente, que mos ta arruinando la vida, a nosotros y a los que vengan detrás de nosotros. Quieren que dexemos de ser ciudadanos y quieren convertinos en esclavos, y nosotros nun podemos aceptar eso.

La llucha, compañeros, ye’l camín. Ye l’únicu camín. La llucha y la unidá. Por eso

¡¡Fuercia y unidá hasta la victoria!!

¡¡Puxa la llucha de la clase obrera!!

¡¡Puxa Asturies!!

Un comentariu

  1. […] y que ye abondo con una mayoría d’escaños nel europarlamentu pa que les coses cambien. L’otru 1 de mayu dixi nel mítin sindical en Xixón que pretender una UE social ye como pidi-y a una anaconda que se faga vexetariana. Ye antinatural, […]

Contestar

Deberíes tar autentificáu pa poder comentar.

Actualizaciones recientes

Comentarios más recientes