Faustino Zapico

Información

Esti artículu ye del 01 Mar 2012, y ta dientro de la sección Blogue.

Etiquetes pa esta entrada

, , , , , , ,

Déficit

Pásanos a toos que munches veces, de la qu’empieza’l típicu telefilm horrible d’Antena 3 d’esos que ponen a primer hora de la tarde, en viendo cinco minutos yá sabemos como va acabar de lo previsible que ye. Personaxes vacios, histories ridícules y finales cantaos. Lo mesmo pasa cola política española y asturiana dende va años, pero especialmente nos caberos meses.

El PP pasó l’anterior legislatura bramando escontra’l gobiernu del PSOE, y prometiendo maravilles pa cuando gobernaren. Pasaron la campaña electoral insinuando midides dures pero ensin especificar nenguna, y faciendo caballu de batalla de la reducción d’impuestos, ente otres recetes supuestamente máxiques pero nunca especificaes.

El guión taba claru. De la que lleguen, anuncien que les cuentes públiques tán muncho pior de lo qu’esperaben, que’l PSOE féxolo tan mal que nun va quedar otra que facer más sacrificios de los que s’esperaben y que de baxar impuestos nada de nada, qu’hai que xubilos y que lo qu’hai que baxar ye’l déficit.

Ta tán visto que da galbana repitilo. Resulta que les comunidaes autónomes son les grandes culpables del –dicen- enorme déficit públicu. Ye raro de creer, cuando’l gran desvíu foi del gastu del estáu central, que tien munchu más marxe pa reducir partides de les que ye responsable, como’l gastu militar o les subvenciones a la Ilesia Católica, por poner dos casos. El gastu de les comunidaes ye nun 80% del so presupuestu pa sanidá y educación. ¿Cómo se corrixe esi presuntu gran déficit si nun ye non yá recortando, sinón amputando nos servicios públicos? D’otru llau, si les comunidaes son tan gastices y son les responsables de que se dispare’l déficit ¿nun ye menos verdá que la gran mayoría d’elles tán gobernaes pol PP, y delles como Valencia o Murcia, ente les más endeldaes, dende muncho anantes de les elecciones de mayu pasaes? ¿Ye posible que nun partíu tan centralista como’l PP los sos caciques locales gastaren a lo xo y la dirección estatal nun lo supiera? ¿Génova nun conocía’l marafundiu valencianu? Y si lu conocía ¿A santu de qué ponen agora la cara de sustu?

Aprueben una reforma llaboral que, almiten, va facer xubir el paru. Esa foi la razón pola que votaron a la escontra de la del PSOE de 2010. Agora faen ellos lo mesmo y salen Rubalcaba y Javier Fernández nes manifestaciones sindicales diciendo qu’abaratar el despidu en tiempu de crisis ye una barbaridá y que ye antisocial ¿Y cuando lo fexeron ellos non? Eso yá nun ye déficit económicu. Nin siquiera lo ye políticu. Ye un déficit de vergoña, de la que nun tienen los cabezaleros del PSOE.

Nos caberos tres meses disparóse’l déficit asturianu. Culpa de toos, hai que dicir. De la oposición que nun dexó gobernar, pero tamién d’un gobiernu que nun yera consciente de controlar poco más d’un terciu de la Xunta Xeneral y que tenía como obligación llevantar una mayoría parlamentaria col so aliáu natural, un PP col que compartía valores y programa. Eso ye déficit de diálogu.

Hai manifestaciones sindicales escontra los recortes. Rúxese –por fin- una fuelga xeneral. La esquierda nacionalista nun ta presente nelles. Prefier preparar la campaña electoral ¿Pa dicir qué? Eso ye déficit d’estratexa.

Los telefilm previsibles d’Antena 3 polo menos acaben bien. El mocín cola mocina y el malu muerre ente horribles sufrimientos. Como nun esconsonemos, los trabayadores y el conxuntu de los ciudadanos asturianos, españoles o europeos vamos acabar muncho pior qu’un telefilm de sobremesa. Y los horribles sufrimientos van ser pa nós.

Contestar

Deberíes tar autentificáu pa poder comentar.

Actualizaciones recientes

Comentarios más recientes