Faustino Zapico

Información

Esti artículu ye del 18 Nov 2011, y ta dientro de la sección L'Arcu de Texu, Les Noticies.

Debate

Debate ente Mariano Rajoy y Pérez Rubalcaba. Espectación. ¿Espectación? Diálogu de sordos ente unu que cuando gobierne va facer lo contario de lo que promete, y otru que promete lo contrario de cuando tuvo gobernando. Ceremonia de la impostura solo apta pa los mui adictos. ¿Quién pue creer na sinceridá de Rajoy cuando promete nun recortar pensiones, sueldos o servicios, o na de Rubalcaba cuando promete xubir los impuestos a les grandes fortunes?

¿Cuáles son les diferencies riales ente los dos grandes partíos de la II Restauración? Unu apoyó y beneficióse de la burbuya inmobiliaria. L’otru también. Unu tien fe ciega nel gran capital como solución al problema qu’esti mesmu crió. L’otru también. Unu apoya la Constitución, la monarquía y el nacionalismu español. L’otru también. Unu defende la OTAN y les sos aventures militares y la subordinación política a los USA. L’otru también. Unu da perceguera. L’otru también.

Rubalcaba pasó’l debate intentando facer confesar a Rajoy qué va facer rialmente cuando llegue al gobiernu. Sábese perdedor y la única opción que tien ye presentar al candidatu del PP como portador del apocalipsis. Rajoy dedicóse a acusar a Rubalcaba de mentirosu, facer brindes al sol y dicir que l’apocalipsis ye lo que tenemos agora, pero que cuando llegue él al gobiernu va dir too meyor. Propuestes programátiques, nenguna. Soflames y demagoxa, a magüeyu.

L’escenariu: gobiernu del PP con mayoría absoluta, recortes a la castellano-manchega cola sida que nun queda otra, vistu’l desastre que dexó Zapatero, gobiernu asturianu aplicando la receta cola sida de que bien la orde d’arriba, esquierda cautiva y desarmada ensin capacidá de respuesta social, PSOE ensin credibilidá nenguna faciendo como que ye oposición y d’esquierda. Única esperanza: que’l 15-M seya quien a texer una alianza con tolos sectores disidentes y plantegue una alternativa social y ciudadana. 2012: l’añu que vamos vivir peligrosamente.

Contestar

Deberíes tar autentificáu pa poder comentar.

Actualizaciones recientes

Comentarios más recientes