Faustino Zapico

Información

Esti artículu ye del 02 Mar 2012, y ta dientro de la sección Blogue.

Etiquetes pa esta entrada

, , ,

De los recortes a los cortes

Énte l’amenaza de la empresa llétrica E.ON de corta-y el suministru a los locales públicos del conceyu de Mieres ocúrrensenos munches coses, pero, como nun tenemos munchu tiempu, vamos facer por resumiles:

a) Esta ye la herencia que mos dexen a los mierenses 32 años de gobiernu del PSOE: nun ye sólo que nesi tiempu perdiéremos más de 15.000 habitantes, o que se marafundiaren millones d’euros n’obres faraóniques mientres falta lo más básico, ye que nun quedaron perres nin pa pagar la lluz, que débese cuantayá.

b) El riesgu d’intervención del ayuntamientu pol gobiernu central ye más que visible. Eso va obligar a facer un axuste “a la griega” nes cuentes municipales. Con pocos ingresos, y ensin marxe pa tener más, daes les poques competencies que nesti país tienen los conceyos, la situación que queda ye dramática.

c) Hai un hospital acabáu pero sigue furrulando’l vieyu porque nun hai perres nin pa facer la mudanza. Mentanto, siguimos con un campus que costó una millonada pero que ta vaciu.

d) Esta situación ye, ente otres, resultáu del propiu modelu territorial que tien el Reinu d’España dende qu’entamó la II Restauración: les comunidaes autónomes y los conceyos son responsables de bona parte del gastu, pero non de la financiación, polo que, cuando lleguen les dures, vien-yos d’arriba un axuste que les dexa nuna situación insostenible. El marxe d’aforru o de política fiscal del gobiernu central ye muncho más ampliu, pero’l de les CC.AA. y los conceyos non, polo que les desixencies de control del gastu per parte de Madrid son pura hipocresía. Quien tien más perres, y tien d’ónde sacales, y aforra menos, nun pué pretender que quien nun les tien aforre muncho más si nun ye dexando de dar servicios básicos.

e) Esto nun ye más que l’aniciu. Nos meses vinientes vamos ver coses como esta y muncho piores. De nós depende que sigamos aceptando lo que mos echen o apostamos por una respuesta organizada. Nes elecciones del 25-M y, sobre too, depués d’estes, que ye cuando’l gobiernu central anuncie’l presupuestu.

Como siempre, depende de nós. De los recortes a los cortes. ¿Hasta’l cortocircuitu?

Contestar

Deberíes tar autentificáu pa poder comentar.

Actualizaciones recientes

Comentarios más recientes