Faustino Zapico

Información

Esti artículu ye del 16 Sep 2009, y ta dientro de la sección L'Arcu de Texu, Les Noticies.

Etiquetes pa esta entrada

, , ,

Col puñu n’alto

Jose Ángel Villa, Alfonso Guerra, Jose Luis Zapatero, Leire Pajín en Rodiezmu col puñu n'altoAnda esprecetada la derechona pol fechu de que na romería peronista de Rodiezmo los oradores llevantaren el puñu al vieyu estilu, entamando asina un alderique ideolóxicu d’esos que tanto-y presten a Zapatero: el partíu que-y regaló perres a la banca pue presentase agora como socialista gracies a un xestu estéticu convenientemente atacáu pola derecha. Ye más, el fechu de comparar el puñu llevantáu del PSOE con un hipotéticu saludu romanu nun mítin del PP ye una traición del subconsciente qu’amuesa lo lloñe que ta’l PP de la derecha europea. Pal PSOE ye un xestu tradicional, una de les poques coses que-y queden de la estética socialista, abandonaes cuantayá la ética y el programa. Pal PP ye reconocer implícitamente que vien de la dictadura franquista, del Movimientu Nacional, que son el partíu que fundó quien firmó la sentencia de muerte de Grimau, que dirixó la campaña de llevantos a los mineros asturianos nos años sesenta, quien ye responsable de les matances de Vitoria y Montejurra.

Equiparar moralmente’l llevantar el puñu col saludu romanu ye meter nel mesmu sacu al que daba’l paséu y al que-y lu daben, al verdugu y a la víctima. Atacar el puñu n’alto ye atacar la memoria de la resistencia antifaxista europea nel añu del setenta aniversariu de la II Guerra Mundial. Ye atacar el Black Power y el movimientu polos derechos civiles de los USA. Ye atacar el primer xestu de Nelson Mandela y demás combatientes del ANC cuando salieron de les prisiones del apartheid sudafricanu. El puñu n’alto ye’l símbolu del poder popular, de la voluntá de llucha escontra les inxusticies, d’apueste pol socialismu. Eso ye lo qu’odia’l PP y lo que quier aparentar el PSOE. Que lu llevante Villa o Areces da risa. Que lu ataque’l PP da ascu.

Contestar

Deberíes tar autentificáu pa poder comentar.

Actualizaciones recientes

Comentarios más recientes