Faustino Zapico

Información

Esti artículu ye del 09 Mar 2011, y ta dientro de la sección L'Arcu de Texu, Les Noticies.

Etiquetes pa esta entrada

, , , , ,

Cites

Xovellanos retratáu por GoyaAtaca Javier Fernández, candidatu del PSOE a la presidencia, a Álvarez Cascos, candidatu de sí mesmu, por citar a Xovellanos y a Campomanes, diciendo qu’ónde se vio eso de citar a xente del sieglu XVIII, como si depués d’ellos nun viniere naide más dignu de ser citáu nos mítines electorales, anque nun sepamos cuálos son los autores de cabecera del insigne candidatu “socialista”.

¿Ye Cascos un sabiondu o Fernández un mazcayu? L’actual clase política asturiana defínese pola so fonda ignorancia. Nun conocen el país al qu’aspiren a gobernar, y nun conocen el pensamientu d’aquellos que, primero d’ellos, sí reflexonaron sobre lo que yera Asturies y lo que tenía de ser. Namás dos candidatos d’estes elecciones de 2011, Cascos y Sánchez Vicente, amosaron nivel nesi sentíu: el primeru por conocer a los clásicos del pensamientu asturianu, el segundu por querer ser él ún d’ellos. Coincídase o non con esos proyectos de país, ye de reconocer que los hai. Nun pue dicise lo mesmo d’otros, porque ¿Cómo calificar a Javier Fernández poles sos palabres, o por aquelles otres de va trés años cuando llegó a falar de la necesidá de defender los valores republicanos “polo demás totalmente compatibles cola actual Constitución”? ¿O cómo calificar a Fernando Lastra cuando dicía que tar arguyosu de ser asturianu yera d’estrema derecha?

Tenemos una clase política ágrafa, que nun escribe sobre’l país, y fondamente illetrada, que nun lu conoz. Si tolo que tien que decir Javier Fernández sobre Xovellanos ye que ye del sieglu XVIII, quier decir qu’él ta nel sieglu XIX, na primera Restauración, na d’aquellos caciques semianalfabetos que mercaben el puestu de diputáu con sobornos directos, amenaces tapecíes, censura y clientelismu. En rialidá nun tamos na primera Restauración, sinón na segunda, que ye abondo asemeyada, y bien d’esfuercios qu’hai que facer pa estremales. Javier Fernández nun los fai, ente otres coses porque nun ta de lleer a los que sí pensaron sobre Asturies.

Contestar

Deberíes tar autentificáu pa poder comentar.

Actualizaciones recientes

Comentarios más recientes