Faustino Zapico

Información

Esti artículu ye del 25 Jan 2011, y ta dientro de la sección L'Arcu de Texu, Les Noticies.

Etiquetes pa esta entrada

, , ,

Cascos

Francisco Álvarez CascosLos que llevamos años llamando al actual réxime español la segunda Restauración polo muncho que s’asemeya a aquel otru que remanó los destinos del Reinu d’España de 1875 a 1923, nun podemos facer otro que plasmar colo muncho que se paecen tamién les manifestaciones de la crisis del propiu réxime.

Va esactamente un sieglu Antonio Maura, ún de los xefes del Partíu Conservador, acabó engarráu col so partíu y acabó entamando la so propia aventura política, que pretendía presentase como rexeneracionista, centrista y modernizadora de la cosa pública. Los antecedentes políticos de Maura nun facín pensar muncho na sinceridá de la so conversión, pero fo quien a xuntar alredol de la so figura una bona parte de la derecha fartuca del statu quo dominante y que quería un cambiu tranquilu que nun fexera tan evidentes les miseries d’un réxime podre y inmoral.

¿Será Cascos el Maura asturianu y español? El so partíu… ¿ye namás p’Asturies o quier ser otra cosa? Maura acabó derrotáu y maltratáu por esi mesmu sistema que, en rialidá, quería salvar. El so fíu Miguel acabó faciéndose republicanu. L’aventura de Cascos ye incierta, pero ye evidente que la so figura va arrastrar un bon fatáu de votu malcontentu col turnismu, fundamentalmente del PP, pero tamién del PSOE, del asturianismu conservador y incluso de sectores más a la esquierda, porque l’asturianismu, en rialidá, ye como l’atéu que necesita tener fe. Tantos años suañando con que venga un profeta a rediminos que cuando apaez un señor enfadáu porque nel so partíu nun lu ponen de candidatu y fala de país vamos toos detrás d’él. Hasta que llega la rialidá, y el santón nun cumple colo que nunca prometió pero qu’otros quixeron creer. Depués vendrá la decepción, pero mentanto, celebrarán lo muncho que van cambiar les coses. Sicasí, remueve’l piteru, y eso ye bono. La crisis de réxime entama pola rotura de los partíos turnistes. A ver si ye d’esta.

Contestar

Deberíes tar autentificáu pa poder comentar.

Actualizaciones recientes

Comentarios más recientes