Faustino Zapico

Información

Esti artículu ye del 05 Nov 2012, y ta dientro de la sección Blogue, L'Arcu de Texu.

Etiquetes pa esta entrada

, , , , , ,

Calabaces

Calabaces nel Día de Difuntos Pasó la fiesta de difuntos, d’un tiempu p’acá rebautizada polos más mozos como Halloween gracies a les milenta películes y series de televisión americanes que mos meten a embute. Pa gran escándalu de los guardianes de les esencies patries, como Pérez Reverte, que diz qu’eso de les calabaces ye un cuentu yankee y que lo del “trucu o tratu” ye una trastada de guah.onos refalfiaos. Tampoco-y gusta a la Ilesia Católica, que diz qu’eso de Halloween ye “una fiesta pagana” que tapez l’auténticu significáu del día de tolos santos. Coime, vaya descubrimientu. Como si nun fuera la ilesia mesma la que desvirtuó la fiesta céltica del Samain pa convertila nuna celebración cristiana. El casu ye qu’agora difuntos, amás d’una sida pa mercar flores, yelo tamién pa mercar calabaces de plásticu o mázcares del bazar xinu más cercanu.

El casu ye que n’El Cabanín, pueblu del conceyu de Mieres, allá pelos años cuarenta, mio padre y los demás nenos teníen el vezu de, na víspera de difuntos, afuracar calabaces, pone-yos güeyos y boca y una vela encesa dientro y dexales nos caminos “p’asustar a les vieyes”. Mio padre tien ochenta años, nun sabe lo que ye Halloween y evidentemente nun facía eso por influencia d’una televisión que nun esistía o d’un cine al que nun diba. Facíalo porque yera una costume heredada quién sabe dende cuándo. Tamién ye verdá que nun se mazcaritaben de Frankestein o de Drácula pa da-y mieu a naide, porque mieu, lo que se diz mieu, nel Mieres de los primeros años de la posguerra dábenlu los que diben tol añu con tricorniu, sotana, turbante o camisa azul. Y esos, como nel Samain, yeren los que podíen llevate una nueche escura pa que nun se supiera más de ti. Eso sí que yera terror.

 

 

Contestar

Deberíes tar autentificáu pa poder comentar.

Actualizaciones recientes

Comentarios más recientes