Faustino Zapico

Información

Esti artículu ye del 15 Dec 2010, y ta dientro de la sección L'Arcu de Texu, Les Noticies.

Etiquetes pa esta entrada

, , , , , ,

Alarma

Torre de control d'un aeropuertuBlanco apunta, Rubalcaba dispara. Depués d’un añu señalando col deu a los controladores aéreos como si fueren los únicos responsables del marafundiu de perres que ye AENA, depués de facer demagoxa falando del  xornal de los controladores, pero non del de la clase política, los executivos d’esa banca financiada por toos o los milenta asesores públicos que nun faen nada, apruébase un decretu que rebaxa les sos condiciones llaborales xusto cuando entama una operación salida, ensin aceptar nenguna de les sos, polo demás, razonables peticiones, como la reducción d’hores o l’aumentu del númberu de controladores. Los controladores, esprecetaos, faen una fuelga illegal -¿podría ser d’otra manera, cuando los servicios mínimos son del 110%?- y el gobiernu decreta l’estáu d’alarma, figura d’escepción que nun s’aprueba nel Reinu d’España dende la dictadura franquista, y que nun llegó a aplicase siquiera nel 23-F. Agora, el linchamientu mediáticu, les amenaces de cárcel y los ministros inflaos d’arguyu.

La operación salió-y reonda al gobiernu de Zapatero. Tresmite firmeza, castiga a un colectivu mal vistu socialmente y aforra perres que podrá marafundiar n’otres coses, como financiar a la banca privada. Privatízase amás AENA cola sida de castigar a los controladores, como si nun llevaren años naguando por ello. Independientemente de que paeza bien qu’un controlador gane un sueldu millonariu, y quien esto escribe nun cree que naide mereza ganar cincuenta veces más qu’otru trabayador, seya albañil, camareru, fubolista o executivu, ye inaceptable recurrir a los militares pa solucionar un conflictu llaboral. Munchos de los qu’aplauden agora van tener ocasión de llamentalo, porque sema un precedente peligrosísimu: abre les puertes a la criminalización de la protesta, protesta que pal viniente 2011 nun puen facer otro que medrar, dao que la crisis sigue y ca vuelta pior. Alarma, el PSOE ta amosando el so verdaderu tortoriu, el de la criminalización de la protesta. Alarma, y a la fuelga.

Contestar

Deberíes tar autentificáu pa poder comentar.

Actualizaciones recientes

Comentarios más recientes